काठमाडौँ । विश्व मौसम विज्ञान संगठन (डब्लूएमओ) ले सन् २०२६ को अन्त्यतिर अल निनो अत्यन्त शक्तिशाली अवस्थामा पुग्न सक्ने चेतावनी दिएको छ।

डब्लूएमओको अक्टोबर ८ मा सार्वजनिक पछिल्लो मौसमी जलवायु अपडेटअनुसार मध्य तथा पूर्वी भूमध्यरेखीय प्रशान्त महासागरको समुद्री सतहको तापक्रम अक्टोबरदेखि डिसेम्बरसम्म औसतभन्दा करिब ३.७ डिग्री सेल्सियस माथि पुग्ने अनुमान गरिएको छ। यसको चरम अवस्था डिसेम्बर आसपास पुग्ने प्रक्षेपण गरिएको छ।

यो तापक्रम वृद्धि सन् २०१५-१६ मा देखिएको २.६ डिग्री सेल्सियसको अघिल्लो कीर्तिमानभन्दा समेत बढी हो। डब्लूएमओका अनुसार यो सन् १९५० यताकै सबैभन्दा शक्तिशाली अल निनोमध्ये एक बन्न सक्ने सम्भावना छ।

डब्लूएमओले अल निनो सन् २०२७ को फेब्रुअरीसम्म कायम रहने सम्भावना करिब १०० प्रतिशत रहेको जनाएको छ। शक्तिशाली अल निनोले विश्वका विभिन्न क्षेत्रमा तापक्रम र वर्षाको ढाँचामा उल्लेख्य परिवर्तन ल्याउन सक्छ।

यसका कारण केही क्षेत्रमा अत्यधिक वर्षा र बाढीको जोखिम बढ्न सक्छ भने अन्य क्षेत्रमा कम वर्षा, खडेरी र चरम गर्मीको सम्भावना बढ्न सक्ने डब्लूएमओको आकलन छ। यद्यपि यसको प्रभाव सबै देश र क्षेत्रमा समान नहुने तथा स्थानीय मौसममा अन्य जलवायु प्रणालीको समेत प्रभाव रहने संगठनले स्पष्ट पारेको छ।

नेपालमा यसको प्रत्यक्ष प्रभावबारे यकिन गर्न राष्ट्रिय तथा क्षेत्रीय मौसम पूर्वानुमानलाई समेत आधार बनाउनुपर्ने हुन्छ। विशेषगरी हिउँदे वर्षा, तापक्रम, कृषि र आगामी मनसुनमा पर्न सक्ने प्रभावबारे थप स्थानीय विश्लेषण आवश्यक हुनेछ।

विश्वव्यापी रूपमा भने शक्तिशाली अल निनोका कारण सन् २०२६ को अन्त्यदेखि २०२७ सम्म मौसमजन्य जोखिम बढ्न सक्ने संकेत देखिएको छ। डब्लूएमओले सरकार तथा सम्बन्धित निकायलाई सम्भावित जोखिम न्यूनीकरणका लागि पूर्वतयारी र पूर्वसूचना प्रणाली थप प्रभावकारी बनाउन आग्रह गरेको छ।