काठमाडौं । नेपाली कांग्रेसको १५औँ महाधिवेशनमा एउटै परिवारका ससुरा र बुहारी नै फरक-फरक क्लस्टरबाट केन्द्रीय सदस्य पदमा प्रतिस्पर्धामा उत्रिएका छन्।

कांग्रेसका पुराना नेता कुशश्री न्यौपाने र उनकी बुहारी युवा नेतृ तथा आर्किटेक्ट इन्जिनियर ई. मेली शाह केन्द्रीय सदस्य पदका लागि उम्मेदवार बनेका हुन्। न्यौपाने अपाङ्गता क्लस्टरबाट र शाह पेशागत महिला क्लस्टरबाट प्रतिस्पर्धामा छन्।

न्यौपानेको चुनावी क्रम संख्या ०५ रहेको छ। उनी लामो समयदेखि कांग्रेसको राजनीतिमा सक्रिय रहँदै आएका छन्। वि.सं. २०३५ सालदेखि पार्टी राजनीतिमा सक्रिय न्यौपानेले पञ्चायतविरोधी आन्दोलनदेखि प्रजातन्त्र पुनःस्थापनाका विभिन्न संघर्षमा सहभागिता जनाएका थिए। राजनीतिक गतिविधिका क्रममा उनले धरपकड र जेल जीवनसमेत भोगेको बताइएको छ।

पार्टीका अग्रज नेता बीपी कोइराला, गणेशमान सिंह र कृष्णप्रसाद भट्टराईसँग नजिक रहेर काम गरेको बताउने न्यौपानेले यसपटक पुराना, निष्ठावान तथा लामो समयदेखि पार्टीमा योगदान गरेका कार्यकर्ताको प्रतिनिधित्व गर्ने उद्देश्यले उम्मेदवारी दिएको बताएका छन्।

यता, न्यौपानेकी बुहारी ई. मेली शाह पेशागत महिला क्लस्टरबाट केन्द्रीय सदस्य पदमा प्रतिस्पर्धा गर्दैछिन्। उनको चुनावी क्रम संख्या ०३ रहेको छ।

डोल्पाबाट प्रतिनिधित्व गर्ने शाह नेपाल विद्यार्थी संघको केन्द्रीय सदस्य हुँदै कांग्रेसको राजनीतिमा सक्रिय भएकी हुन्। पेशाले आर्किटेक्ट इन्जिनियर रहेकी शाहले पार्टीमा युवा पुस्ताको सहभागिता, महिला सशक्तीकरण र नीतिगत सुधारका विषयलाई प्राथमिकतामा राख्दै आएको बताइएको छ।

ससुरा-बुहारी दुवै फरक क्लस्टरबाट उम्मेदवार बनेपछि उनीहरूको उम्मेदवारीले कांग्रेस महाधिवेशनमा छुट्टै चासो सिर्जना गरेको छ। एकै परिवारका दुई सदस्य भए पनि दुवैले आ–आफ्नो राजनीतिक अनुभव, पृष्ठभूमि र एजेन्डाका आधारमा छुट्टाछुट्टै चुनावी अभियान अघि बढाइरहेका छन्।

न्यौपाने लामो राजनीतिक संघर्ष र संगठनात्मक अनुभवका आधारमा चुनावी मैदानमा छन् भने शाह युवा पुस्ता र पेशागत क्षेत्रको प्रतिनिधित्व गर्दै प्रतिस्पर्धामा उत्रिएकी छन्।

दुवै उम्मेदवार आ-आफ्नो क्लस्टरमा प्रतिस्पर्धामा रहेकाले उनीहरूको उम्मेदवारी र चुनावी परिणामलाई कांग्रेस महाधिवेशन प्रतिनिधिहरू तथा पार्टीभित्रका नेताहरूले चासोका साथ हेरिरहेका छन्।