श्रीलङ्काका पूर्वराष्ट्रपति महिन्दा राजपाक्षेका परिवारमाथि भ्रष्टाचारसम्बन्धी अनुसन्धान अघि बढिरहेका बेला उनकी पत्नी शिरान्ती राजपाक्षेको अग्रिम जमानत याचिका अदालतले खारेज गरेको छ। प्रहरीको नियन्त्रणमा रहेका राजपाक्षे पनि अस्वस्थ भएको जनाइएको छ।

घूसखोरी तथा भ्रष्टाचार अनुसन्धान आयोगका अधिकारीहरूले बयान लिएपछि शिरान्तीलाई किरुलापोनेस्थित निवासबाटै पक्राउ गरिएको थियो।

शिरान्तीमाथि कोलम्बोस्थित ‘लेडी रिडवे चिल्ड्रन्स हस्पिटल’लाई सीटी स्क्यानर मेसिन खरिद गरी हस्तान्तरण गर्ने उद्देश्यले ‘सिरिलिया सेविया’ नामक संस्थामार्फत सङ्कलन गरिएको १० मिलियन श्रीलङ्काली रुपैयाँ हिनामिना गरेको आरोप छ। उक्त रकमबाट खरिद गरिने भनिएको मेसिन अस्पताललाई उपलब्ध नगराइएको आरोप लगाइएको छ।

यसै मुद्दामा पक्राउ पर्ने सम्भावनाबाट बच्न शिरान्तीले अग्रिम जमानतका लागि अदालतमा निवेदन दिएकी थिइन्। तर, कोलम्बोका मजिस्ट्रेटले उक्त याचिका खारेज गरिदिएका छन्।

राजपाक्षे परिवारमाथि भइरहेको कानुनी अनुसन्धान शिरान्तीमा मात्र सीमित छैन। महिन्दा राजपाक्षेका जेठा छोरा, सांसदसमेत रहेका नमल राजपाक्षे पनि वित्तीय अनियमिततासम्बन्धी विभिन्न मुद्दामा अनुसन्धानको दायरामा छन्।