काठमाडौं । चलचित्र ‘जनै हराएको बाहुन : सम्बन्धका धागाहरू’ को छायांकन सम्पन्न भएको छ । ललितपुरको च्यासलस्थित एक पार्टी प्यालेसमा आयोजित इन्डक्ल्याप पार्टीमार्फत निर्माण पक्षले ३५ दिनमा छायांकन सम्पन्न भएको जानकारी दिएको हो।

निर्देशक हिमाल न्यौपानेको निर्देशनमा तयार भएको यो चलचित्र उनको डेब्यु निर्देशन हो। काठमाडौं, ललितपुर, भक्तपुर र काभ्रेका विभिन्न स्थानमा छायांकन गरिएको चलचित्रले गाउँबाट सहर आएका एक सरल व्यक्तिले भोगेका अप्रत्याशित परिस्थिति र त्यसले ल्याएको जीवन परिवर्तनको कथा प्रस्तुत गर्नेछ। चलचित्रमा आमा–छोराबीचको भावनात्मक सम्बन्धलाई पनि विशेष जोड दिइएको छ।

बलियो कलाकार阵 देखिएको चलचित्रमा विजय बराल, केकी अधिकारी, मिरुना मगर, गौरव पहाडी, सुशांक मैनाली, भोलाराज सापकोटा, रियर राई, भावना खपांगी मगर, रुपेश लामा र सुमन थापा लगायतको अभिनय रहनेछ। असोसियट निर्देशकको रुपमा ‘प्रेमगीत ३’ का अभिनेता मनिष राउत रहेका छन्।

इन्डक्ल्याप कार्यक्रममा बोल्दै अभिनेता विजय बरालले विभिन्न प्रतिभाशाली कलाकारहरूसँग काम गर्ने अवसर मिलेको बताए। “यो चलचित्रले दर्शकको मन छोला भन्ने विश्वास छ,” उनले भने।

पेपरक्लिप प्रोडक्सनको ब्यानरमा निर्माण भएको चलचित्रका निर्माता कमल न्यौपाने र विमल न्यौपाने हुन्। सह-निर्मातामा आरके मानन्धर, रुपेश लामा, सिआर बस्नेत र फिलिप डिसी छन्। चलचित्रको कथा, पटकथा र संवाद भानुभक्त ढकालले लेखेका हुन्।

चलचित्रमा प्रसान्त सिवाकोटी, एसडी योगी, थानेश्वर गौतम र अर्जुन पोखरेलको संगीत रहनेछ भने नवीन गुरुङ डीओपी तथा कृष्ण परियार सिनेमाटोग्राफर रहेका छन्।तीजको अवसर पारेर भदौमा चलचित्र रिलिज गर्ने योजना रहेको भए पनि मिति भने हालसम्म तय भइसकेको छैन।