सिरियाका अन्तरिम राष्ट्रपति अहमद अल–शराले घातक साम्प्रदायिक द्वन्द्वपछि अल्पसङ्ख्यक समुदायको सुरक्षाका लागि गरेको नयाँ प्रतिबद्धतालाई इजरायलले शनिबार अस्वीकार गरेको छ ।

सिरियाको स्वेइदा उक्त द्वन्द्वका कारण एक सातामा करिब ९४० जनाको मृत्यु भएको थियो विदेशमन्त्री गिदोन सारले एक्समा लेख्नुभएको छ, “अल–शाराको सिरियामा कुर्द, ड्रुज, अलावी वा क्रिश्चियनजस्ता अल्पसङ्ख्यकको सदस्य हुनु निकै खतरनाक छ ।”

उहाँले भन्नुभयो, “विगत ६ महिनामा यो कुरा पटक–पटक प्रमाणित भएको छ ।”

सिरियाको ड्रुज समुदाय बसोबास गर्ने क्षेत्रमा हिंसा चर्किरहेका बेला संयुक्त राज्य अमेरिकाले सिरिया र इजरायलबीच युद्धविरामको सम्झौता गराएको घोषणा गरेको छ ।

यो सङ्कटले कार्यवाहक राष्ट्रपति अहमद अल–शराआ को नियन्त्रण क्षमतामाथि गम्भीर प्रश्न उठाएको छ ।

इजरायलले बुधबार राजधानी दमास्कसमा हवाई आक्रमण गर्दै सिरियाली सेनाको मुख्यालय नै लक्षित गरेको थियो । अमेरिकाका सिरिया मामिलाका विशेष दूत टम बेराकले शनिबार बिहानै जानकारी दिँदै भन्नुभयो, “शराआ र इजरायली प्रधानमन्त्री बेन्जामिन नेतन्याहूबीच अमेरिकाको पहलमा युद्धविरामको सहमति भएको छ ।” उक्त सम्झौतामा टर्कीए र जोर्डनको समर्थन रहेको पनि उहाँले बताउनुभयो ।

बेराकले सामाजिक सञ्जाल ‘एक्स’ मा लेख्नुभयो,“ड्रुज, बेदुइन र सुन्नी समुदायलाई हतियार बिसाएर शान्तिपूर्ण र एकीकृत सिरियाली पहिचान निर्माण गर्न आह्वान गर्दछौं ।”

विदेशमन्त्री सारले सिरियामा रहेका अल्पसङ्ख्यक समुदायको सुरक्षा र अधिकार सुनिश्चित गर्नु र अल्पसङ्ख्यक नागरिकको परिवारमा सिरियाको नयाँ स्वीकार्यतालाई उनीहरूको संरक्षणमा सुनिश्चित गर्नु अन्तर्राष्ट्रिय समुदायको कर्तव्य भएको बताउनुभएको छ ।

सिरियाली गृह मन्त्रालयले इजरायली सैन्य हस्तक्षेप रोक्नका लागि अमेरिकी मध्यस्थतामा भएको युद्धविराम सम्झौताअन्तर्गत शनिबारदेखि ड्रुज हार्टल्याण्डमा तैनाथ हुन थालेको हो ।

इजरायलले यसै साताको सुरुमा स्वेइदा र राजधानी दमास्कस दुवैमा रक्षा मन्त्रालयका सेनामाथि बम बारी गरेको थियो र दक्षिणी प्रान्तमा द्रुजका नागरिकहरूमाथि संक्षिप्त तैनाथीका क्रममा उनीहरूमाथि मृत्युदण्ड र अन्य दुव्र्यवहारको आरोप लगाएपछि उनीहरूलाई फिर्ता लिन बाध्य पारेको थियो।

आफ्नै ठूलो ड्रुज समुदाय रहेको इजरायलले अल्पसङ्ख्यकहरूको रक्षा गरिरहेको बताएको छ ।

केही कूटनीतिज्ञ र विश्लेषकका अनुसार यसको लक्ष्य सिरियामा सेनालाई कमजोर बनाउनु हो । सिरियाली सेना ड्रुज समुदायको ऐतिहासिक शत्रु हो । सिरियाली सेना डिसेम्बरमा शराआको सुन्नी इस्लामवादीहरूले इरानी सहयोगी बशर अल असदलाई अपदस्थ गरेपछि कमजोर बिन्दुमा देखिएको छ ।

–एक हप्तामा ९४० भन्दा बढीको मृत्यु –

सिरियाको ड्रुज अल्पसङ्ख्यक समुदायको बाहुल्य रहेको स्वेइदा प्रान्तमा गत सातादेखि जारी हिंसामा परी मृत्यु हुनेको सङ्ख्या शनिबार ९४० पुगेको एक युद्ध अनुगमनकर्ताले बताएका छन् ।

सिरियन अब्जरभेटरी फर ह्युमन राइट्सका अनुसार मृत्यु हुनेमा ३२६ ड्रुज लडाकु र २६२ ड्रुज नागरिक रहेका छन्, जसमध्ये १८२ जनालाई रक्षा र गृह मन्त्रालयका कर्मचारीले मृत्युदण्ड दिएका छन् ।

यसमा ३१२ जना सरकारी सुरक्षाकर्मी र २१ जना सुन्नी बेडुइनको पनि मृत्यु भएको थियो जसमध्ये तीन जना सर्वसाधारण थिए र उनीहरूलाई ड्रुज लडाकुहरूले मृत्युदण्ड दिएका थिए । इजरायली आक्रमणमा परी अन्य १५ जना सरकारी सैनिकको मृत्यु भएको अब्जरभेटरीले जनाएको छ ।