मकवानपुर । साउन महिनाको दोस्रो सोमबारको अवसरमा हेटौंडा–४ स्थित पशुपतिनाथ मन्दिरमा बिहानैदेखि भक्तजनको ठूलो भिड लागेको छ । विशेषगरी साउनको सोमबारलाई भगवान शिवको पूजा–आराधनाको विशेष दिन मानिन्छ, जसकारण आज देशभरका शिवालयहरूमा भक्तजनहरूको उल्लेख्य सहभागिता देखिएको छ ।

मन्दिर व्यवस्थापकका अनुसार आज बिहानैदेखि मन्दिरको मूल ढोका खोलिएको थियो, जसले भक्तजनलाई सहज रूपमा दर्शन, पूजा र व्रत गर्न सुविधा पुगेको छ। हरियो लुगा, बेलपत्र, धतुरो, र जलसहित आएका भक्तजनहरू लामबद्ध भई शिवलिंगमा अर्पण गर्दै पूजा गरिरहेका थिए ।धार्मिक विश्वासअनुसार, साउनको सोमबार व्रत गरेमा मनोकांक्षा पूर्ण हुने र अटल सौभाग्य प्राप्त हुने मान्यता रहेको छ। यसै विश्वासका आधारमा आज बिहानदेखि नै व्रतालु महिला, पुरुष र युवाहरूको उल्लेख्य उपस्थिति मन्दिर परिसरमा देखिएको थियो।

यस वर्ष साउन महिनामा कुल चार सोमबार पर्ने भएकाले प्रत्येक सोमबार भक्तजनको भीड लाग्ने अपेक्षा गरिएको छ। भक्तजनको सुरक्षाका लागि मन्दिर परिसरमा प्रहरी र स्वयंसेवकहरूको समेत खटिएको थियो।शान्त वातावरणमा भक्तिभावका साथ आजको दोस्रो सोमबारले हेटौंडा पशुपतिनाथ मन्दिरमा पुनः एकपटक आस्था र सांस्कृतिक एकताको झल्को दिएको देखिन्छ ।