इन्डोनेसियाको अर्थतन्त्र सन् २०२५ को दोस्रो त्रैमासिकमा वार्षिक आधारमा ५.१२ प्रतिशतले वृद्धि भएको छ। अघिल्लो त्रैमासिकमा यो वृद्धि दर ४.८७ प्रतिशत रहेको इन्डोनेसियाको केन्द्रीय तथ्यांक संस्था (बिपीएस) ले मंगलबार सार्वजनिक गरेको हो।

बिपीएसका उपप्रमुख एडी महमुदले पत्रकार सम्मेलनमा भन्नुभयो, “सन् २०२५ को दोस्रो त्रैमासिकमा चालु मूल्यअनुसार इन्डोनेसियाको कुल गार्हस्थ उत्पादन पाँच हजार ९४७ खर्ब रुपियाँ पुगेको छ।”

उत्पादनतर्फ, सबैभन्दा बढी वृद्धि ११.३१ प्रतिशतको दरले ‘अन्य सेवा क्षेत्र’ मा देखिएको छ। त्यसपछि व्यवसायिक सेवा ९.३१ प्रतिशत, यातायात तथा गोदाम सेवा ८.५२ प्रतिशत, तथा होटल तथा खाना सेवा ८.०४ प्रतिशतले वृद्धि भएको छ।

खर्चतर्फ, सबैभन्दा बढी १०.६७ प्रतिशतले वस्तु तथा सेवा निर्यात बढेको छ। त्यसपछि गैर-नाफामुखी संस्थाहरूको खर्च ७.८२ प्रतिशत र स्थिर पूँजी निर्माण ६.९९ प्रतिशतले वृद्धि भएको छ।

जाभा टापुका प्रदेशहरूले ५.२४ प्रतिशत आर्थिक वृद्धि हासिल गरेका छन् र तिनीहरूको योगदान राष्ट्रिय उत्पादनमा ५६.९४ प्रतिशत रहेको छ, जसले देशको समग्र आर्थिक वृद्धिमा जाभा टापुको प्रमुख भूमिका देखाउँछ।