काठमाडौं । नेकपा माओवादी केन्द्रका उपमहासचिव जनार्दन शर्माले पार्टी विघटित अवस्थामा पुगिसकेको टिप्पणी गरेका छन् । केन्द्रीय कमिटी बैठकमा आफ्नो धारणा राख्दै लाखौँ पार्टी सदस्य र नेतृत्व भएको पार्टी हेडक्वार्टर जलिरहँदा पनि प्रतिवाद गर्न नसक्ने ठाउँमा पुगेको बताएका छन् ।

उनले भने, ‘हाम्रो पार्टी यतिबेला विघटित अवस्थामा छ । पार्टी केन्द्रीय कार्यालय आगजनीमा परेको छ । आन्दोलनले निम्त्याउने सम्भावित खतराबारे पूर्व आंकलन गर्न नसक्नु, लाखौँ पार्टी सदस्य र नेतृत्वको यति ठुलो फर्मेसन हुँदाहुँदै हाम्रो पार्टी हेडक्वार्टर जलिरहँदा हामी कोही पनि प्रतिवाद गर्न नसक्ने ठाउँमा पुग्नु, आफैलाई बचाउने हैसियत नहुनुले आधारभूत वर्ग हामीसँग रिसाएको वास्तविकतालाई उजागर गरेको छ ।’

आन्दोलन सबैतिर विस्तार भइरहेको बेलामा के गर्ने भनेर अन्यौलता रहेका नेता–कार्यकर्ताहरूलाई मार्गदर्शन गर्न सकेनौँ राज्यविहीनताको अवस्थासँगै पार्टीविहीनताको अवस्था रहेकाले पार्टी विघटनको तथ्यलाई स्पष्ट गर्ने उनले बताएका छन् ।

प्रस्तावमा भनिएको छ, ‘यो परिस्थितिबाट पार्टीलाई फेरि नयाँ ढङ्गले गठन गरी हाम्रा अभिभारा र जनताका सपनाहरूलाई पूरा गर्ने जनयुद्धमा भएका त्याग र बलिदानहरूको स्मरण गर्दै सम्पूर्ण कमजोरीहरूलाई धोइ पखाली गर्ने गरी हाम्रो सोच दृष्टिकोण र भूमिकालाई आजको जनभावना आन्दोलनको माग र हाम्रा विगतका कमीहरू नदोहोरिने गरी पार्टीलाई नयाँ निर्माण गर्न जरुरी छ ।’

नेतृत्व हस्तान्तरणबारे विगतमा नै माग गरेको भए पनि जेनजी आन्दोलनले ती कुरा सही साबित गरेको बताएका छन् । प्रस्तावमा भनिएको छ, ‘अब यथास्थितिमा पार्टी अगाडि बढ्न नैतिक मनोवैज्ञानिक विधिगत र राजनीतिक अवस्थाका दृष्टिले पनि नसक्ने अवस्थालाई आत्मसात् गर्नु पर्दछ । पार्टी पुनर्गठनको प्रक्रियालाई अगाडि बढाउन यस बैठकबाट अध्यक्ष कमरेड लगायत हामी सबै पदाधिकारीहरूले आफ्नो पदबाट राजीनामा गर्नुपर्दछ महाधिवेशनसम्म पार्टीलाई संयोजन गर्ने गरी पदाधिकारीबाट नभए स्थायी समितिबाट कार्यभार दिन डराउनु हुँदैन ।’

प्रचण्डले हिजो खेलेको भूमिकासहित टिमको भूमिका समेतको सम्मान र वर्तमानको आवश्यकता माग पूरा गर्दै समस्याको समाधानको बाटो खोल्ने उनको भनाइ छ। प्रस्तावमा भनिएको छ, ‘हाम्रो पार्टीको महाधिवेशन घोषणा गर्दा अध्यक्ष कमरेड प्रचण्डसहित दशकौँदेखि एउटै पदमा रहेका हामी सबै पदाधिकारी सामूहिक राजीनामा दिऔँ र आगामी महाधिवेशनमा निर्वाचन प्रक्रियामा सहभागी नहुने निर्णय यसै बैठकबाट गरौं ।’

हेर्नुस् जनार्दनको प्रस्ताव