जनकपुर । जनकपुरमा आज (शनिबार) पनि सात दलीय गठबन्धनका दलहरूले धर्ना दिएका छन् । प्रदेशका सात दलका सांसदहरू सभामुखविरुद्धको कदमको विरोधस्वरूप प्रदेश सभा भवन अगाडि धर्ना दिएका हुन् ।

सभामुख रामचन्द्र मण्डलले पदीय आचरणविरुद्ध काम गरेको भन्दै सांसदहरूले उनलाई हटाउन प्रस्ताव दर्ता गरेका थिए । यही प्रस्तावबारे उपसभामुखसँग जानकारी लिन आफूहरू सामूहिक रूपमा सभाभवन पुगेको लोसपा सांसद उपेन्द्र महतोले बताए ।

सभामुख मण्डलले आफूविरुद्ध प्रस्ताव दर्ता भएपछि प्रत्युत्तरस्वरूप पाँच जना सांसदलाई पदमुक्त गरेका थिए । तर, सभामुखको निर्णय उपसभामुखले उल्टाइदिएकी थिइन् । मधेस प्रदेशमा पछिल्लो समय राजनीतिक विवाद चर्किदै गएको छ । मधेश प्रदेशमा एमालेका सरोज यादवलाई ठूलो दलको आधारमा मुख्यमन्त्री नियुक्त गरिएको निर्णयपछि सत्ता पक्ष–विपक्षबीचको राजनीतिक विवाद चर्किदै गइरहेको छ ।