गगनले भने – विशेष महाधिवेशनलाई अवैधानिक भन्न सक्दैसक्दैन, ढुक्क भएर बस्नुस्
Nepal One HD २८ पुष २०८२ १४:५९
काठमाडौं । नेपाली कांग्रेसका महामन्त्री गगनकुमार थापाले विशेष महाधिवेशन वैधानिक भएको दाबी गरेका छन् ।
काठमाडौंको भृकुटीमण्डपमा जारी विशेष महाधिवेशनमा समसामयिक राजनीतिक प्रस्ताव पेस गर्दै उनले संविधान, कानुन र निर्वाचन आयोगले समेत आफूहरूले आयोजना गरेको विशेष महाधिवेशनलाई अवैधानिक भन्न नसक्ने जिकिर गरे ।
महामन्त्री थापाले विशेष महाधिवेशनको वैैधानिकतामाथि कानुनतः प्रश्न उठाउने आँट कसैले गर्न नसक्ने दाबी गरे ।
उनले भने,‘यो विशेष महाधिवेशन वैैधानिक छ कि छैन ? यसको वैधानिक प्रावधान के छ ? हाम्रो संविधानले के भन्छ ? विरलै मात्र यस्तो संविधान छ, जुन संविधानमा राजनीतिक दलसम्बन्धी व्यवस्था गरिएको छ । त्यो मध्येको एउटा संविधान भनेको हाम्रो संविधान पनि हो ।’
उनले विशेष महाधिवेशन वैधानिक भएको जिकिर गर्दै महाधिवेशन प्रतिनिधिहरूले ढुक्क हुन आग्रह गरे ।
‘त्यो संविधानको व्यवस्था के छ, राजनीतिक दलसम्बन्धी ऐनमा के व्यवस्था छ ? हाम्रो विधान निर्वाचन आयोगबाट प्रमाणित विधान हो,’ उनले भने, ‘आज यो विषयमा कसैले कानुनी प्रश्न उठायो भने नेपालको संविधानको आधारमा, नेपालको नेपालको निर्वाचन आयोगले १, २, ३ हाम्रो विशेष अधिवेशनलाई अवैधानिक भन्न सक्दै सक्दैन । ढुक्क भएर बस्नुस् । सक्दैन ।’
महामन्त्री थापाले आफूहरूले कांग्रेसलाई जागृत गराउन पनि विशेष महाधिवेशन आयोजना गर्नुपरेको बताए ।
