जनकपुरधाम । राष्ट्रिय स्वतन्त्र पार्टी (रास्वपा) का वरिष्ठ नेता तथा काठमाडौं महानगरपालिकाका पूर्व मेयर बालेन्द्र शाह (बालेन) ले जनकपुरधामबाट आफ्नो धार्मिक–राजनीतिक यात्रा सुरु गरेका छन् । आइतबार साँझ जनकपुरधाम पुगेका शाह सोमबार बिहानै ऐतिहासिक जानकी मन्दिर पुगेर नियमित बिहानी आरतीमा सहभागी भएका छन् ।

बिहानै जानकी मन्दिर पुगेका बालेनले पूजाआजा तथा दर्शन गरेका थिए । उक्त अवसरमा प्रतिनिधिसभा सदस्य तथा पूर्व सांसद डा. अमरेश कुमार सिंह पनि उनीसँगै उपस्थित थिए । दुवैले सँगै बसेर आरती अवलोकन गर्नुका साथै पूजाअर्चना गरेका थिए । धार्मिक तथा ऐतिहासिक महत्व बोकेको मन्दिरमा दुई चर्चित राजनीतिक व्यक्तित्वलाई एकसाथ देखेपछि स्थानीय बासिन्दा र दर्शनार्थीहरूबीच विशेष चासो र चर्चा देखिएको थियो ।

बालेन रास्वपाले सोमबार जनकपुरधाममा आयोजना गर्न लागेको ‘परिवर्तन उद्घोष सभा’ लाई सम्बोधन गर्न जनकपुर पुगेका हुन् । सो सभामा रास्वपाका सभापति रवि लामिछाने, वरिष्ठ नेता बालेन्द्र शाहलगायत शीर्ष नेताहरूले सम्बोधन गर्ने कार्यक्रम तय भएको छ । यही सभामार्फत पूर्व सांसद डा. अमरेश सिंह रास्वपामा प्रवेश गर्ने तयारीमा रहेको बताइएको छ ।

जनसभाअघि बालेनको कार्यक्रम धार्मिक गतिविधिमा मात्र सीमित छैन । उनले मधेश आन्दोलनका प्रथम सहिद रमेश महतोप्रति श्रद्धाञ्जली अर्पण गर्न सिराहाको लहान जाने कार्यक्रम समेत बनाएका छन् । मधेश आन्दोलनको क्रममा ज्यान गुमाएका सहिदहरूको सम्झनामा हरेक वर्ष माघ ५ गते मधेसमा बलिदानी दिवस मनाइन्छ ।

धार्मिक आस्था, मधेश आन्दोलनप्रतिको सम्मान र राजनीतिक सन्देशलाई एकसाथ जोड्दै बालेनको जनकपुरधाम यात्रा अर्थपूर्ण रूपमा हेरिएको छ । जानकी मन्दिर दर्शनदेखि जनसभासम्मको उनको उपस्थितिलाई आगामी राजनीतिक गतिविधिको संकेतका रूपमा पनि विश्लेषण गर्न थालिएको छ ।