पोखरा । मेडिकल व्यवसायी तथा ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’ का संयोजक दुर्गा प्रसाईं सोमबार पोखराबाट पक्राउ परेका छन् । कास्की प्रहरीले निर्वाचन आयोगको अनुरोधअनुसार उनलाई पक्राउ गरी थप अनुसन्धानका लागि काठमाडौं पठाउने तयारी गरेको जनाएको छ ।

निर्वाचन आयोगमाथि गम्भीर आरोप लगाएको अभिव्यक्तिपछि प्रसाईं प्रहरीको निगरानीमा आएका थिए । उनले नेपाली कांग्रेसको विशेष महाधिवेशनसँग जोडेर निर्वाचन आयोगले गगन थापा पक्षलाई आधिकारिकता दिन करोडौं रुपैयाँ लिएको दाबी सार्वजनिक रूपमा गरेका थिए। सामाजिक सञ्जालमा समेत भिडियोमार्फत अभिव्यक्ति दिएपछि आयोगले यसलाई गम्भीर आरोप मान्दै प्रहरीमा उजुरी दर्ता गराएको थियो ।

यसैबीच, प्रसाईंले रकम लगानी गरेर सरकारी वेबसाइट ह्याक गर्ने र डाटा चोरी गर्ने योजना बनाएको आरोपसमेत लागेको छ । सो सम्बन्धी अडियो सार्वजनिक भएपछि विषय थप संवेदनशील बनेको थियो । आयोगले अनुसन्धानका लागि पत्राचार गरेपछि कास्की प्रहरीले पोखरामा रहेका प्रसाईंलाई पक्राउ गरेको हो ।

प्रसाईं पछिल्लो समय निर्वाचन बहिष्कारदेखि विभिन्न आन्दोलनका कार्यक्रम घोषणा गर्दै आएका थिए । राजसंस्था पुनस्र्थापना, प्रदेश संरचनाको खारेजी, हिन्दु अधिराज्य लगायतका मागसहित उनी देशव्यापी अभियानमा सक्रिय थिए । यसअघि तीनकुने घटनामा समेत पक्राउ परेका प्रसाईं पटक–पटक पक्राउ र रिहाइको प्रक्रियामा रहँदै आएका छन् ।

सरकार र प्रसाईं नेतृत्वको अभियानबीच भने माघ २ गते मात्र सहमति भएको थियो । सिंहदरबारमा दुवै पक्षबीच १२ बुँदे सम्झौतामा हस्ताक्षर भएपछि आन्दोलनका कार्यक्रम तत्कालका लागि स्थगित गरिएको थियो । यसअघि कार्तिक २६ गते गृहमन्त्रीसँग २७ बुँदे माग प्रस्तुत गरिएकोमा त्यसकै निरन्तरतामा सहमति भएको थियो ।

सम्झौताअनुसार आन्दोलनका क्रममा लागेका संगठित अपराध र फौजदारी मुद्दा फिर्ता लिने प्रक्रिया अघि बढाउने, संवैधानिक तथा कानुनी सुधारका विषयमा अध्ययन गर्न उच्चस्तरीय संविधान संशोधन सुझाव आयोग गठन गर्ने, साथै लघुवित्त र सहकारीका ऋणीलाई राहत दिन चक्रवर्ती कोष स्थापना गर्ने सहमति भएको थियो । तर सम्झौता भएको केही समय नबित्दै निर्वाचन आयोगमाथि लगाइएका आरोप र साइबर अपराधको योजनासम्बन्धी विषय सार्वजनिक भएपछि प्रसाईं पुनः प्रहरी हिरासतमा पुगेका छन् । कास्की प्रहरी प्रवक्ता तथा सूचना अधिकारी डिएसपी हरिबहादुर बस्नेतका अनुसार उनलाई काठमाडौं पठाएर जिल्ला प्रहरी परिसर काठमाडौंमार्फत थप अनुसन्धान गरिनेछ ।