काठमाडौं – उदयपुर सिमेन्ट उद्योग लिमिटेडका तत्कालीन महाप्रबन्धक सुरेन्द्रकुमार पौडेलसहित आठ जनाविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ ।

उद्योगमा रहँदा व्यापक आर्थिक अनियमितता गरेको आरोपमा उनीहरूमाथि विशेष अदालतमा मुद्दा दायर गरिएको हो ।

अख्तियारका अनुसार पौडेलसँगै तत्कालीन निमित्त महाप्रबन्धक नवल किशोर साह, नायव महाप्रबन्धक महेश काफ्ले, उत्पादन महाशाखा प्रमुख सञ्जयकुमार लाल, भण्डार महाशाखा प्रमुख महेश साह, उत्पादन विभाग प्रमुख रविचन्द्र पौडेल, अर्का विभाग प्रमुख हरि अधिकारी तथा बिक्री विभाग प्रमुख रामबहादुर जिसीविरुद्ध मुद्दा चलाइएको छ ।

अनुसन्धानका क्रममा उनीहरूले उद्योगको खरिद, उत्पादन र भण्डारण प्रक्रियामा मिलेमतो गरी १२ करोडदेखि ४६ करोड रुपैयाँसम्मको आर्थिक अनियमितता गरेको अख्तियारको दाबी छ ।

अख्तियारका अनुसार सुरेन्द्रकुमार पौडेल र नायव महाप्रबन्धक महेश काफ्लेले संयुक्त रूपमा १२ करोड ६३ लाख रुपैयाँ बराबरको भ्रष्टाचार गरेको आरोप लगाइएको छ ।

त्यसैगरी अन्य अभियुक्तहरूविरुद्ध ४६ करोड ५२ लाख रुपैयाँ बराबरको भ्रष्टाचार गरेको अभियोग पत्रमा उल्लेख गरिएको छ ।

अख्तियारले उद्योगको व्यवस्थापन तहबाटै योजनाबद्ध रूपमा सार्वजनिक सम्पत्तिको दुरुपयोग गरिएको निष्कर्ष निकालेको छ ।

अख्तियारले अभियुक्तहरूबाट बिगो रकम असुल उपर गर्न, कैद तथा जरिवाना सजायको माग गर्दै विशेष अदालतमा मुद्दा दायर गरेको जनाएको छ ।