काठमाडौं । उनी कहिले ‘नेहा’ थिइन् कहिले ‘निशा’ । कहिले अर्कैको नागरिकतामा ‘पुनम कुमारी ।’ यिनै अनेक नामधारी महिलाको साँचो नाम हो– निर्मला महतो ।

२५ वर्षीया उनी यतिबेला प्रहरी हिरासतमा छिन् । उनी कहिले आफूलाई नेपाल प्रहरीको केन्द्रीय अनुसन्धान ब्युरो (सीआईबी)को असई भन्थिन् ।

भन्सार र प्रशासनमा बलियो पहुँच भएको दाबी गर्थिन् । नाम अदलीबदली र सीआईबीको असईसँगै भन्सार र प्रशासनमा पहुँज भएको दाबी गर्नुको भित्री रहस्य थियो– सर्वसाधारणलाई झुक्याएर पैसा उठाउने योजनाबद्ध ठगी ।

सर्लाहीको कबिलासी नगरपालिका–१०, सलेमपुरकी २५ वर्षीया महतोले वर्षौंदेखि आफूलाई प्रहरी अधिकृतको रूपमा प्रस्तुत गर्दै रौतहट र सर्लाहीका विभिन्न स्थानमा मानिसहरूबाट लाखौँ रुपैयाँ ठगी गरेको प्रहरी अनुसन्धानबाट खुलेको छ ।

ठगीको एक प्रमुख घटनामा लालबन्दीका राजेश्वर साह परे । सस्तोमा भन्सारबाट स्कारपियो गाडी निकालिदिने आश्वासन दिएर महतोले उनीबाट पटक–पटक गरी १ लाख ५० हजार रुपैयाँ लिइन् ।

आफू सीआईबीकी असई भएको र भन्सारसम्म सिधा पहुँच रहेको उनको दाबीले साहलाई विश्वास दिलायो । तर गाडी कहिल्यै आएन, पैसा पनि फर्किएन ।

निर्मलाको ठगीको दायरा यत्तिमै सीमित रहेन । रौतहटको चन्द्रपुरका सन्तोषबहादुर विश्वकर्माको ज्वेलर्स पसलबाट उनले २ लाख ७४ हजार रुपैयाँ बराबरको सुनचाँदी लिएर फर्किइनन् ।

गुजराका विजय साह बनियाँसँग घरायसी समस्या देखाउँदै पाँच लाख रुपैयाँ नगद लिइन् । चन्द्रपुरकै प्रविण साहको किराना पसलबाट उधारो सामान लिइन्, स्कारपियो गाडी भाडामा लिइन् र १ लाख २६ हजार रुपैयाँ बराबरको रकम नतिरी सम्पर्कविहीन बनिन् ।

एकपछि अर्को मानिस ठगीमा परेपछि प्रहरीमा उजुरी पर्‍यो । उजुरीका आधारमा गरिएको अनुसन्धानमा सबैभन्दा गम्भीर तथ्य त्यतिबेला बाहिर आयो, जब महतोले अरूको सक्कल नागरिकता प्रयोग गरेर आफ्नै सरकारी पहिचान बनाएको खुलेको छ ।

उनले लालबन्दीका राजेश्वर साहकी श्रीमती पुनम कुमारीको नागरिकता र तस्बिर प्रयोग गरी इलाका प्रशासन कार्यालय चन्द्रनिगाहपुरबाट राष्ट्रिय परिचयपत्र बनाएकी थिइन् । त्यही झुटो पहिचानका आधारमा उनले माछापुच्छ्रे बैंक लिमिटेड, चन्द्रपुर शाखामा पुनम कुमारीकै नाममा खाता खोलेर कारोबार गरेको प्रहरीको भनाइ छ ।

खातामा पर्याप्त रकम नभएको अवस्थामा चेक काटेर दिँदै थप ठगी गरेको तथ्य पनि अनुसन्धानमा खुलेको छ ।

उनी गत ४ माघमा पक्राउ परेकी हुन् । तर, उनको सक्कली पहिचान पत्ता लगाउन प्रहरीलाई २० दिन लागेको चन्द्रपुरका प्रहरी नायव उपरीक्षक (डीएसपी रुपा लाबुङले बताइन् । ‘एकभन्दा बढी नाम र कागजात प्रयोग गरिएकाले पहिचान पुष्टि गर्न समय लाग्यो,’ उनले भनिन् ।

हाल महतोविरुद्ध ठगी, आपराधिक विश्वासघात र आपराधिक लाभसम्बन्धी कसुरमा अनुसन्धान जारी छ । प्रहरीका अनुसार घटनामा थप पीडित हुनसक्ने आशंकासहित विवरण संकलन भइरहेको छ ।