काठमाडौं । आम जनता पार्टी (आजपा)का अध्यक्ष प्रभु साहले जेन–जी विद्रोहपछि रास्वपा सभापति रवि लामिछाने जेलबाट निस्केको बाहेक केही उपलब्धि नभएको बताएका छन् ।

वास्तविक जेन–जीहरू अहिले पनि आन्दोलनमै रहेको भन्दै उनले रवि जेलबाट निस्केको बाहेक उपलब्धि केही नभएको साहले बताएका हुन् ।

उनले रवि र बालेन्द्र शाह (बालेन)लाई रावणको रूपमा चित्रण गर्दै उनीहरू जोगीको भेषमा आएर र उनीहरूलाई मतदाताले चिन्नुपर्ने बताए ।

‘रावणहरूले जोगीको ड्रेस लगाएर मान्छेलाई भ्रमित गरिहेका छन् । त्यो नयाँ युग र युवाहरूले चिन्नुपर्छ,’ उनले सोधे, ‘जेन–जी आन्दोलनबाट के प्राप्त भयो ? रवि लामिछाने जेलबाट मुक्त हुनुभयो । आन्दोलनका आह्वानकर्ता ओर्जिनल जेन–जीहरू अहिले पनि आन्दोलनमै हुनुहुन्छ, अग्रभागमा लड्नेहरू अहिले जेलमा छन् ।’

उनले भ्रष्टाचारी र हत्याराहरूले माफी पाएको भन्दै गम्भीर असन्तोष प्रकट गरे ।

तर, आन्दोलनमा देखा नपर्ने, जिम्मा पनि लिन नपर्ने, आन्दोलन मेरो हो भन्न पनि नपर्ने तर आन्दोलनको कमान्डर भन्न पनि नछोड्ने र आन्दोलनबाट सत्ता स्वार्थको खेल भएको भन्दै बालेनको आलोचना गरे ।