काठमाडौं । नेपाल प्रहरीको केन्द्रीय अनुसन्धान ब्यूरो (सीआईबी)ले पर्वतारोहण तथा ट्रेकिङ क्षेत्रमा ‘फेक रेस्क्यु’ गरी बीमा रकम ठगी गरेको आरोपमा थप दुई जनालाई पक्राउ गरेकाे छ ।

सीआईबीले ठमेलस्थित रोयल होलिडेज एडभेञ्चर एण्ड ट्राभल कम्पनीका प्रतिनिधि २८ वर्षीय सन्दीप तिवारी र विमान सेवा सञ्चालक सङ्घका पूर्वउपाध्यक्ष ५६ वर्षीय राजेन्द्रबहादुर सिंहलाई पक्राउ गरेको हो ।

ब्यूरोले बुधबार जारी गरेको प्रेस विज्ञप्तिअनुसार उच्च हिमाली क्षेत्रमा ट्रेकिङका क्रममा सामान्य स्वास्थ्य समस्या वा दुर्घटना भएको देखाई विदेशी पर्यटकको उद्धार (रेस्क्यु) गरेको नाटक गरी बीमा कम्पनीबाट अवैध रूपमा रकम असुल्ने गिरोह सक्रिय रहेको पाइएको हो।

अनुसन्धानका क्रममा ट्रेकिङ कम्पनी, रेस्क्यु सेवा प्रदायक, अस्पताल, हेलिकप्टर कम्पनी तथा विदेशी बीमा कम्पनीका नेपालस्थित एजेन्टबीच मिलेमतो देखिएको सीआईबीले जनाएको छ।

फेक रेस्क्यु प्रकरणमा संलग्न कम्पनीहरूमा माउन्टेन रेस्क्यू सर्भिस प्रा.लि. , एभरेष्ट एक्सपेरियन्स एण्ड असिस्टेन्स प्रा.लि. र नेपाल चार्टर सर्भिस प्रा. लि. रहेका छन्।

विदेशी पर्यटकलाई अस्पताल भर्ना तथा डिस्चार्ज रिपोर्ट, मेडिकल रिपोर्ट लगायतका कागजात तयार गरी अनावश्यक रूपमा उद्धार गरिएको देखाई बीमा रकम असुलिएको सीआईबीको दाबी छ।

यस्तो गतिविधिले अन्तर्राष्ट्रिय सञ्चारमाध्यममा नेपाललाई ‘पर्यटकका लागि असुरक्षित गन्तव्य’ भनेर नकारात्मक प्रचार भएको प्रहरीको भनाइ छ।

हालसम्म यस प्रकरणमा ट्रेकिङ कम्पनी, रेस्क्यु कम्पनी, अस्पताल तथा अन्य सम्बद्ध निकायका गरी जम्मा ९ जनालाई पक्राउ गरिएको प्रहरीले जनाएको छ।

उनीहरूलाई संगठित अपराध र ठगीसम्बन्धी कसुरमा मुद्दा दर्ता गरी काठमाडौं जिल्ला अदालतबाट म्याद थप अनुमति लिई अनुसन्धान अघि बढाइएको सीआईबीले जनाएको छ।