काठमाडौं । रुकुम (पूर्व)काे उत्तरी भेगबाट मतपेटिका सङ्‍कलन गर्न हेलिकप्टर उडेकाे छ ।

प्रमुख जिल्ला अधिकारी सीता परियारका अनुसार बिहीबार साँझ ५ बजे नेपाली सेनाको हेलिकप्टर सदरमुकाम रुकुमकोटबाट पुथा उत्तरगंगा गाउँपालिकातर्फ उडेकाे हाे ।

उनले पैदल यात्रामा दुई दिन लाग्ने भएपछि हेलिकप्टरबाट मतपेटिका सङ्‍कलन थालिएकाे बताइन् ।

​पहिलो चरणमा पुथा उत्तरगंगा गाउँपालिका-२ स्थित पेल्मा र सोही वडाको आधारभूत विद्यालय हार्दिवाङका मतपेटिकाहरू संकलन गरेर ल्याइएको छ ।

आजै दोस्रो चरणमा सिस्ने गाउँपालिका–१ स्थित साविकको पाखापानी गाविस भवनमा रहेको मतदान केन्द्रका मतपेटिका सदरमुकाम ल्याइएको परियारको भनाइ छ ।

जिल्लाका कुल ५७ मतदान स्थलमध्ये बाँकी ५४ वटा केन्द्रका मतपेटिकाहरू भने पैदल मार्गबाटै आज रातिसम्म सदरमुकाम पुर्‍याइनेछ।