काठमाडौं। भारतीय प्रधानमन्त्री नरेन्द्र मोदीले राष्ट्रिय स्वतन्त्र पार्टीका वरिष्ठ नेता बालेन्द्र शाह (बालेन) र सभापति रवि लामिछानेलाई टेलिफोनमार्फत बधाई दिएपछि बालेनले उनको पोस्टमा कमेन्ट गर्दै नेपाल-भारत सम्बन्ध थप मजबुत बनाउने प्रतिबद्धता जनाएका छन्।

सोमबार साँझ मोदीले रास्वपाका दुवै नेतासँग टेलिफोन संवाद गरेको जानकारी फेसबुकमार्फत सार्वजनिक गरेका थिए। उनले फेसबुकमा लेखेका थिए, ‘मैले निर्वाचनमा रास्वपाको जितका लागि दुवै नेतालाई बधाई दिएको छु । सँगै नयाँ बन्ने सरकारका लागि शुभकामना दिँदै भारतीय सरकारका तर्फबाट साझा प्रगति, समृद्धि र जनकल्याणका लागि प्रतिबद्धता पनि जनाएको छु ।’

रास्वपाका तर्फबाट प्रधानमन्त्रीको उम्मेदवार बनी झापा-५ बाट निर्वाचित बालेनले मोदीकै उक्त पोस्टमा प्रतिक्रिया दिँदै भारतसँगको सम्बन्धलाई अझ उचाइमा पुर्‍याउने विश्वास व्यक्त गरेका छन्।

‘धन्यवाद छ शुभकामनाका लागि, सम्माननिय प्रधानमन्त्री नरेन्द्र मोदी ज्यु । नेपाल–भारतबीच विद्यमान ऐतिहासिक, घनिष्ठ तथा बहुआयामिक सम्बन्धलाई आगामी दिनहरूमा अझ सुदृढ, प्रगाढ र परिणाममुखी बनाउन हामी सँगै सहकार्य गर्ने विश्वास व्यक्त गर्दछु,’ उनले लेखेका छन्, ‘साथै, लगातार दुई पटक विश्वकप उपाधि जित्न सफल भएकोमा भारत सरकार तथा भारतीय जनतालाई हार्दिक बधाई ज्ञापन गर्न चाहन्छु ।’