काठमाडौं। राष्ट्रिय स्वतन्त्र पार्टी (रास्वपा) ले फागुन २१ गते सम्पन्न प्रतिनिधिसभा निर्वाचनमा झन्डै दुई-तिहाइ सिट हातपारेपछि नयाँ सरकार गठनबारे गरेको आन्तरिक तयारी अन्तिम चरणमा पुगेको छ।

चुनाव परिणाम सार्वजनिक भएसँगै पार्टी भित्र मन्त्रीको चयनदेखि मन्त्रालय पुनःसंरचना तकका विषयमा निरन्तर छलफल चलिरहेको छ। चुनावअघि जारी गरिएको वाचापत्रअनुसार मन्त्रालय संख्या घटाउने एजेन्डालाई रास्वपाले प्राथमिकतामा राखेको छ, र यही आधारमा सरकारको आकार १५ देखि १८ मन्त्रालयभित्र सीमित गर्ने प्रस्ताव टेबुलमा परेको पार्टी स्रोत बताउँछ।

पार्टी भित्र मन्त्री छनोटको विषय पनि समानान्तर रूपमा अघि बढिरहेको छ। स्रोतका अनुसार उपसभापति डीपी अर्याल र महामन्त्री सुनिल लम्साल मध्ये एकलाई गृह मन्त्रालय र उपसभापति स्वर्णिम वाग्लेलाई अर्थ मन्त्रालय दिनेबारे गम्भीर छलफल भइरहेको छ। दुवै नेताको संगठनात्मक भूमिका, जनविश्वास, र विशेषज्ञतालाई ध्यानमा राखेर उनीहरूलाई जिम्मेवारी दिन पार्टी भित्र व्यापक सहमति बन्दै गएको बताइन्छ।

यस्तै, प्रवक्ता मनिष झा, सांसद शिशिर खनाल, सोबिता गौतम, राजुनाथ पाण्डे, सस्मित पोखरेल लगायतलाई पनि मन्त्री बनाउने सम्भावनाबारे आन्तरिक स्तरमा निकै क्रियाशील बहस चलिरहेको छ। विस्वसनिया स्रोतका अनुसार शिशिर खनाललाई परराष्ट्र मन्त्रालय र सोबिता गौतमलाई कानुन मन्त्रालय दिने प्रस्ताव पनि औपचारिक रूपमा छलफलमा छ।

पार्टी सभापती रवि लामिछानेले सभामुख पद युवालाई दिने प्राथमिकता राखेका छन्, तर कसलाई ल्याउने भन्ने विषय भने अझै टुंगो लागिसकेको छैन। सरकार गठनको तयारीसँगै प्रधानमन्त्रीको शपथ ग्रहण समारोहमा विदेशी राष्ट्राध्यक्षहरूको सहभागिता सुनिश्चित गर्न समन्वय गर्ने विषयमा पनि पार्टी सक्रिय रहेको महामन्त्री कविन्द्र बुर्लाकोटीले बताए।

चैत १२ गते नव-निर्वाचित सांसदले शपथ लिने कार्यक्रम रहेको छ। त्यसको भोलिपल्ट रास्वपाका वरिष्ठ नेता बालेन शाहले प्रधानमन्त्रीको शपथ ग्रहण गर्ने तय भएको छ। सरकार गठनका विभिन्न आयामबारे बिहीबार साँझ अध्यक्ष लामिछाने, वरिष्ठ नेता शाह, उपसभापति अर्याल र उपसभापति वाग्लेबीच वैठक बसेको र त्यहाँ मन्त्रालयगत संरचना, जनप्रतिनिधिको जिम्मेवारी र पहिलो १०० दिनको एजेन्डाबारे पनि गहिरो छलफल भएको बताइन्छ।