काठमाडौं। नयाँ जनादेशअनुसार गठन भएको सरकारले सक्रिय बनाएको अभियानअन्तर्गत प्रहरीले गुण्डागर्दी विरुद्ध विशेष अपरेशन सुरु गरेको छ। अपराध अनुसन्धान कार्यालय र काठमाडौं प्रहरी परिसरले गुण्डागर्दीमा संलग्न व्यक्तिहरूलाई नियन्त्रणमा लिएर अनुसन्धान थालेको हो।

अपराध अनुसन्धान कार्यालयका एसएसपी सन्तोष खड्काका अनुसार, शुक्रबार राति मात्र १३ जनालाई उपत्यकाका विभिन्न स्थानबाट पक्राउ गरिएको छ। पक्राउ परेकाहरूमा अशोक गिरी, सञ्जीव लामा, सुरेश गुरुङ, किमजोङ बोस लगायत रहेका छन्।

काठमाडौं प्रहरी परिसरले पनि चार जनालाई नियन्त्रणमा लिएर अनुसन्धान सुरु गरेको छ। श्याम लामा समूहका प्रविण गुरुङ, बाफल एरियामा गुण्डागर्दी गर्ने बिर्जु महर्जन, कलंकी क्षेत्रका सुनज कार्की र स्यूचाटार क्षेत्रका सरु हुमागाईं पक्राउ परेका छन्।

यस अभियानमा प्रहरीले पछिल्लो समय बिचौलियाहरूलाई पनि नियन्त्रणमा लिएर अनुसन्धान गरिरहेको छ। विभिन्न सरकारी कार्यालयहरूमा बिचौलियाको बिगबिगी भएको गुनासो आएपछि प्रहरीले सक्रियता देखाएको हो।