काठमाडौं । नेपाल प्रहरीले गुण्डागर्दी, बिचौलियापन तथा अभद्र व्यवहारजस्ता गैरकानुनी गतिविधिविरुद्ध सञ्चालन गरेको अभियानमा चार दिनमै २ सय २६ जना पक्राउ परेका छन्।

केन्द्रीय प्रहरी प्रवक्ता प्रहरी नायब महानिरीक्षक अविनारायण काफ्लेका अनुसार चैत १८, १९, २० र २१ गतेसम्म सञ्चालन गरिएको उक्त अभियानमा उनीहरूलाई नियन्त्रणमा लिई कानुनी कारबाही प्रक्रिया अघि बढाइएको हो।

प्रहरी प्रधान कार्यालयले सार्वजनिक गरेको विवरणअनुसार चैत १८ गते काठमाडौं उपत्यकाबाट ५१ जना र कोशी प्रदेशबाट १८ जना पक्राउ परेका थिए।

चैत १९ गते कोशी प्रदेशबाट एक, मधेस प्रदेशबाट सात, बागमती प्रदेशबाट २३, गण्डकी प्रदेशबाट दुई र कर्णाली प्रदेशबाट ११ जना पक्राउ परेका छन्।

त्यसैगरी चैत २० गते मधेस प्रदेशबाट आठ, गण्डकी प्रदेशबाट १०, लुम्बिनी प्रदेशबाट चार र सुदूरपश्चिम प्रदेशबाट दुई जनालाई नियन्त्रणमा लिइएको छ।

चैत २१ गते पुनः काठमाडौं उपत्यकाबाट ६२ जना पक्राउ परेका छन्।

प्रहरीका अनुसार पक्राउ पर्नेहरूमा गुण्डागर्दी गर्ने, बिचौलियाको भूमिका खेल्ने, यातायात तथा मालपोत कार्यालयमा सर्वसाधारणलाई दुःख दिने तथा सार्वजनिक स्थलमा अभद्र व्यवहार गर्ने व्यक्तिहरू रहेका छन्।

प्रवक्ता काफ्लेले यस्तो अभियान आगामी दिनमा पनि निरन्तर जारी रहने जानकारी दिएका छन्।