काठमाडौं। यौनव्यवसायमा  संलग्न युगाण्डाका दुई युवतीलाई देश निकाला गरिएको छ। प्रहरीले फागुन ११ गते काठमाडौं महानगरपालिका-२६ ठमेल, फायरचोकबाट नियन्त्रणमा लिएका २० युगाण्डियन युवतीमध्ये दुईजनालाई देश निकाला (डिपोट) गरिएको हो ।

जिल्ला प्रहरी परिसर काठमाडौंका प्रवक्ता एसपी पवनकुमार भट्टराईका अनुसार पक्राउ परेकालाई अध्यागमन विभागमा बुझाउने क्रममा आइतबार दुई युवतीलाई देश निकाला गरिएको हो भने अन्यलाई अझै निगरानीमा राखिएको छ। डिपोर्ट हुनेमा हजाराह बाटामुलिसा कलाना र बिट्टी नानबुदु रहेका छन्।

यौन तथा अनैतिक क्रियाकलाप तथा अभद्र व्यवहारमा संलग्न गरेको अभियोगमा कलाना र नाबुदुसहित २० युवती पक्राउ परेका थिए । उनीहरूलाई पक्राउ गरेपछि काठमाडौंस्थित सम्बन्धित देशको दूतावाससँग समन्वय गरिएको थियो । त्यसक्रममा दूतावासले आफ्ना नागरिकको जिम्मेवारी लिएको, जिम्मेवारी लिन नचाहेकालाई अध्यागमनमा पेश गरिँदा डिपोर्ट भएका हुन् ।

२७ देखि ३८ वर्ष उमेरसम्मका ती युवतीमध्ये कतिपयले अनैतिक क्रियाकलाप नगर्ने प्रतिवद्धता जनाएका कारण उनीहरुलाई निगरानीमा राखिएको जनाइएको छ। उनीहरूका बारेमा राष्ट्रिय मानव अधिकार आयोगले पनि चासो राखेको एसपी भट्टराईले बताए ।

प्रहरीका अनुसार ठमेल, क्षेत्रपाटी, ज्याठा, दरबारमार्ग, स्वयम्भू र सामाखुसीलगायतका क्षेत्रमा अनैतिक गतिविधिमा संलग्न रहेको सूचनाका आधारमा उनीहरूलाई कारबाही गरिएको हो। विशेषगरी ठमेल र दरबारमार्ग क्षेत्रका नाइट क्लबका ग्राहकलाई लक्षित गरी उनीहरू गतिविधिमा संलग्न हुने गरेको पाइएको प्रहरीले जनाएको छ।