काठमाडौं । ठगी तथा बैंकिङ कसूर सम्बन्धी मुद्दामा फरार रहेका दुई प्रतिवादी पक्राउ परेका छन्।

पुनम पोखरेल काफ्ले लगायतको जाहेरीका आधारमा फरार रहेका जीवनकुमार ठाकुर र उनका छोरा निहाल ठाकुरलाई प्रहरीले पक्राउ गरेको हो। बुवा–छोरा रहेका उनीहरूलाई काठमाडौंको बसुन्धाराबाट नियन्त्रणमा लिइएको प्रहरीले जनाएको छ।

प्रहरीका अनुसार जीवनकुमारले काठमाडौंको न्यूरोडमा करिब १५ वर्षदेखि स्वर्ण सुनचाँदी पसल आफ्नो छोराको नाममा दर्ता गरी सञ्चालन गर्दै आएका थिए। तर पछिल्लो ८ महिनादेखि उनीहरू ग्राहकहरूलाई ठगी गरेर सम्पर्कविहीन भई फरार रहेका थिए।

उनीहरूले टिकटकमार्फत पुराना सुनचाँदीका गहना सस्तो दरमा बनाइदिने भन्दै प्रचारसमेत गर्ने गरेको खुलेको छ।

उनीहरूविरुद्ध एक करोड २० लाख ९२ हजार ९६७ रुपैयाँ बिगो दाबी गरिएको प्रहरीले जनाएको छ।