काठमाडौं। क्रिप्टोकरेन्सी कारोबारमा संलग्न रहेको आरोपमा प्रहरीले चार जनालाई पक्राउ गरेको छ। काठमाडौं उपत्यका अपराध अनुसन्धान कार्यालयको टोलीले प्राप्त सूचनाका आधारमा सोमबार उनीहरूलाई नियन्त्रणमा लिएको हो।

गैरकानुनी रूपमा क्रिप्टोकरेन्सी कारोबार भइरहेको जानकारीपछि अनुसन्धान अघि बढाइएको एसपी मनोहरप्रसाद भट्टले जानकारी दिए । पक्राउ पर्नेमा चितवन रत्ननगरका ३२ वर्षीय सवन अधिकारी, काठमाडौंका २५ वर्षीय आशिष अधिकारी, चितवनका ३२ वर्षीय रबिन जिआर र ललितपुरका ३६ वर्षीय अनित्य शाक्य रहेका छन्।

प्रहरीले उनीहरूबाट करिब ३० लाख रुपैयाँ नगद बरामद गरेको छ। साथै क्रिप्टोकरेन्सी कारोबारमा प्रयोग हुने विद्युतीय उपकरण, ६ वटा मोबाइल फोन र एक म्याकबुक पनि जफत गरिएको छ।

उनीहरूविरुद्ध मुलुकी अपराध संहिता २०७४ को दफा १२५ (क) अनुसार हुण्डी कारोबार तथा दफा १६२ (क) अनुसार अभौतिक मुद्रा प्रयोगसम्बन्धी कसुरमा अनुसन्धान अघि बढाइएको प्रहरीले जनाएको छ।