ललितपुर। ललितपुरको पाटन स्थित कृष्ण मन्दिर परिसरमा भएको चक्कु प्रहार घटनामा दाजुभाइको ज्यान गएको छ। प्रहरीका अनुसार सामान्य वादविवाद आपसी झगडामा परिणत भई चक्कु हानाहानसम्म पुगेपछि ३३ वर्षीय सुमीत नेम्बाङ र उनका २६ वर्षीय भाइ सिर्जन नेम्बाङको मृत्यु भएको हो।

प्रहरी वृत्त मंगलबजारका एक अधिकारीले नाम नखुलाइ नेपालवन एचडीसँग बताए अनुसार, ‘सामान्य झगडाकै क्रममा चक्कु प्रहार भयो। ’ 

‘चक्कु प्रहार गर्ने व्यक्तिलाई नियन्त्रणमा लिइसकिएको र घटनाबारे थप अनुसन्धान भइरहेको छ’, उनले भने। 

प्रहरीका अनुसार दुवैजनामाथि चक्कु प्रहार गरेको आरोप सञ्जीव नेपाली नाम गरेका व्यक्तिमाथि लागेको छ। चक्कु प्रहारबाट गम्भीर घाइते भएका सुमीत र सिर्जन नेम्बाङलाई तत्कालै बी एन्ड बी अस्पताल लगिएको थियो। उपचारका क्रममा दुवैजनाको मृत्यु भएको प्रहरीले पुष्टि गरेको छ।

यस घटनाले पाटन क्षेत्रको सुरक्षाब्यवस्थाप्रति स्थानीयहरूलाई चिन्तित बनाएको छ भने प्रहरीले घटनास्थल आसपास थप सुरक्षा निगरानी बढाएको जनाएको छ।