काठमाडौं । गणतन्त्र नेपालका प्रधानमन्त्री बालेन्द्र शाह (बालेन)ले राजतन्त्रकालीन नाम ‘महेन्द्र राजमार्ग’ ब्युँताइदिएका छन् ।

देशमा गणतन्त्र आएपछि महेन्द्र राजमार्गको नाम बदलेर ‘पूर्व–पश्चिम’ राखिएको थियो । तर, प्रधानमन्त्री बालेनले ‘राष्ट्रिय प्रतिबद्धता’को मस्यौदामा गणतन्त्रकालीन नाम ‘पूर्व–पश्चिम राजमार्गको नाम हटाएर ‘राजतन्त्रकालीन’ नाम महेन्द्र राजमार्गलाई ब्युँताइदिएका हुन् ।

विगतमा कतिपयले बालेनलाई राजतन्त्रतिर झुकाव राख्ने नेता भन्ने गरेका थिए । हालै संविधान संशोधनका लागि बहसपत्र तयार गर्न गठित कार्यदलका संयोजक राजतन्त्रतर्फ नै झुकाव राख्ने रास्वपा पूर्वसांसद असीम शाहलाई बनाएको पृष्ठभूमिमा प्रधानमन्त्री बालेनले राजतन्त्रकालीन राजमार्गको नाम ब्युँताइदिए ।

यसलाई लिएर प्रधानमन्त्री बालेनको आलोचना र तारिफ दुबै भइरहेको छ । देशमा गणतन्त्र प्राप्तिको आन्दोलनका एक योद्धा रहेका पूर्वमन्त्री सुधन किरातीले बालेनको यस्तो कदमको खुलेरै विरोध गरेका छन् ।

उनले प्रश्न गरेका छन्,– के गणतन्त्रलाई रास्वपाले खिलको रूपमा लिन थालेको हो ?

तर, केहीले भने राजा महेन्द्रले सोभियत रुस र चीनसँग सहयोग लिएर केही कठिन अवस्थामा देशको पूर्वी भाग र पश्चिम भागलाई जोड्ने राजमार्ग बनाएको हुनाले महेन्द्र राजमार्ग भन्नु कुनै आपत्ति मान्नु नपर्ने भन्दै बालेन्द्र सरकारले ब्युँताएको नाममा समर्थन जनाएका छन् ।

१ हजार २८ किलोमिटर रहेको सडक केही अन्तर्राष्ट्रिय शक्ति केन्द्रको तीब्र दबाबबीच राजा महेन्द्रले खण्डखण्डमा निर्माण गराएका थिए ।

उनकै नामबाट पछि राजमार्गको नाम महेन्द्र राजमार्ग भनिएको थियो । देशमा १५ जेठ २०६५ मा गणतन्त्र घोषणापछि यो राजमार्गको नाम फेरेर पूर्वपश्चिम घोषणा गरिएको थियो ।