धनुषा। धनुषामा तीन दिनदेखि बेपत्ता रहेका एक पुरुष मृत अवस्थामा फेला परेका छन्।

बुधबार साँझदेखि सम्पर्कविहीन भएका बटेश्वर गाउँपालिका-४ का ६० वर्षीय जगतबहादुर थापाको शव शुक्रबार बिहान स्थानीय जगदीश रविदासको बाँसघारीमा भेटिएको इलाका प्रहरी कार्यालय सखुवा महेन्द्रनगरका प्रहरी निरीक्षक राजाराम यादवले जानकारी दिए।

मृतकका छोरा अमित थापाका अनुसार बुधबार साँझदेखि नै जगतबहादुर बेपत्ता भएका थिए। त्यस समयमा उनले मादक पदार्थ सेवन गरेको बताइएको छ।

अत्यधिक मदिरा सेवनका कारण मृत्यु भएको हुन सक्ने प्रहरीको प्रारम्भिक अनुमान रहेको छ। यद्यपि वास्तविक कारण भने पोस्टमार्टम रिपोर्ट आएपछि मात्रै स्पष्ट हुने प्रहरीले जनाएको छ।

प्रहरीले शव पोस्टमार्टमका लागि पठाएको र घटनाबारे थप अनुसन्धान भइरहेको जनाएको छ।