झापा। झापाको मेचीनगर-१५ ज्यामिरगढीमा खेर जाने जैविक सामग्री प्रयोग गरी ‘पेलेट ऊर्जा’ उत्पादन सुरु गरिएको छ।

पराजुली बायोमास ब्रिकेट उद्योग ले सुरु गरेको यो उत्पादनमा पत्थर कोइला र दाउराको विकल्पका रूपमा प्रयोग गर्न मिल्ने दानेदार इन्धन तयार गरिन्छ। उद्योगका अनुसार यसको उत्पादन क्षमता १२ घण्टामा करिब ७० हजार किलोसम्म रहेको छ।

उद्योगमा उखुको खोस्टा, बाँसका टुक्रा, काठका फोहोर र पातपतिङ्गर जस्ता जैविक सामग्री प्रशोधन गरी पेलेट बनाइन्छ। उत्पादन भएको इन्धन झापासहित अन्य जिल्ला र भारतसम्म निर्यात गर्ने योजना रहेको छ।

सस्तो र कम प्रदूषण गर्ने इन्धनको माग बढ्दै गएसँगै यस्तो पेलेट उत्पादन विस्तार हुने देखिएको छ। यसले कोइला आयात घटाउने र स्थानीय स्रोतको उपयोग बढाउने अपेक्षा गरिएको छ।