काठमाडौं। चालु आर्थिक वर्ष २०८२–८३ को नौ महिनामा नयाँ जीवन बीमा व्यवसाय (प्रथम बीमा शुल्क) मा उत्साहजनक वृद्धि देखिएको छ । नेपाल बीमा प्राधिकरणबाट प्राप्त तथ्यांक अनुसार यस अवधिमा नयाँ जीवन बीमा व्यवसाय ४१.२७ प्रतिशतले बढेको छ ।

हाल नेपालमा १४ ठूला र तीन लघु जीवन बीमा कम्पनी सञ्चालनमा छन् । गत आर्थिक वर्षको सोही अवधिमा २४ अर्ब ८८ करोड ६३ लाख रुपैयाँ प्रथम बीमा शुल्क संकलन भएको थियो भने चालु आवको नौ महिनामा यो बढेर ३५ अर्ब १५ करोड ६५ लाख रुपैयाँ पुगेको छ ।

समीक्षा अवधिमा कुल जीवन बीमा व्यवसाय पनि १३.२० प्रतिशतले बढेको छ । गत आवको नौ महिनामा एक खर्ब २७ अर्ब तीन करोड ६९ लाख रुपैयाँ बीमा शुल्क संकलन भएकोमा चालु आवमा यो बढेर एक खर्ब ४३ अर्ब ८१ करोड एक लाख ६८ हजार रुपैयाँ पुगेको छ ।

यस अवधिमा वैदेशिक रोजगार बीमाबाट दुई अर्ब ५० करोड ७५ लाख रुपैयाँ र नवीकरणबाट एक खर्ब आठ अर्ब ६५ करोड ३६ लाख रुपैयाँ संकलन भएको छ ।

कुन कम्पनी अगाडि?

समीक्षा अवधिमा नेपाल लाइफ इन्स्योरेन्सले सबैभन्दा धेरै ३६ अर्ब ८६ करोड १९ लाख रुपैयाँ बीमा शुल्क संकलन गरेको छ । दोस्रो स्थानमा नेशनल लाइफ इन्स्योरेन्स रहेको छ, जसले १७ अर्ब सात करोड ९४ लाख रुपैयाँ संकलन गरेको छ ।

तेस्रो स्थानमा लाइफ इन्स्योरेन्स कर्पोरेशन (एलआईसी) रहेको छ, जसले १५ अर्ब १७ करोड आठ लाख रुपैयाँ संकलन गरेको छ । त्यसैगरी हिमालयन लाइफले १३ अर्ब २६ करोड ६१ लाख रुपैयाँ, राष्ट्रिय बीमा कम्पनीले नौ अर्ब ११ करोड ८३ लाख रुपैयाँ, सूर्यज्योति लाइफले आठ अर्ब ५५ करोड १५ लाख रुपैयाँ संकलन गरेका छन् ।

एसियन लाइफले सात अर्ब २४ करोड ७० लाख, सिटिजन लाइफले छ अर्ब ६ करोड ७१ लाख, सानिमा लाइफले पाँच अर्ब ४२ करोड ४४ लाख, आईएमई लाइफले चार अर्ब ९५ करोड १३ लाख र मेट लाइफले चार अर्ब ९० करोड ५४ लाख रुपैयाँ बीमा शुल्क संकलन गरेका छन् ।

त्यसैगरी रिलायबल नेपाल लाइफले चार अर्ब ४४ करोड ९० लाख, प्रभु महालक्ष्मी लाइफले चार अर्ब १९ करोड २२ लाख र सन नेपाल लाइफले तीन अर्ब १७ करोड १९ लाख रुपैयाँ संकलन गरेका छन् ।

लघु जीवन बीमा कम्पनीतर्फ क्रेष्ट माइक्रो लाइफले ३० करोड ५४ लाख, गार्डियन माइक्रो लाइफले ३० करोड ४० लाख र लिवर्टी माइक्रो लाइफले २३ करोड ६० लाख रुपैयाँ बीमा शुल्क संकलन गरेका छन् ।

यो विवरण वैदेशिक रोजगार बीमा बाहेकको बीमा शुल्क संकलनमा आधारित रहेको जनाइएको छ ।