काठमाडौं । नेकपा एमालेले पार्टी सदस्यता विस्तार तथा नयाँ पुस्तालाई संगठनसँग जोड्ने उद्देश्यसहित पार्टी सदस्यका छोराछोरीको सम्मेलन आयोजना गर्ने योजना अघि सारेको छ।

जेठ २० र २१ गते संगठन विभागले आयोजना गरेको राष्ट्रिय कार्यशालाबाट एमालेले पार्टी आबद्ध परिवारका छोराछोरीलाई संगठित गर्ने नयाँ संकल्प सार्वजनिक गरेको हो।

कार्यशालाबाट पारित संकल्पमा नयाँ पुस्तासँग अन्तरसंवाद कार्यक्रम सञ्चालन गर्दै पार्टी सदस्यका छोराछोरीहरूको सम्मेलन सबै तहका कमिटीमार्फत आयोजना गर्ने उल्लेख गरिएको छ।

‘नयाँ पुस्तासँग अन्तरसंवाद कार्यक्रमको आयोजना गरी पार्टी आबद्ध परिवारका छोराछोरीहरूको सम्मेलन सबै कमिटीले आयोजना गर्ने घोषणा गर्दछ,’ संकल्पपत्रमा भनिएको छ।

एमालेका लागि यो अभियान भने नयाँ होइन। २०८० वैशाखमा बसेको केन्द्रीय कमिटीको पाँचौं बैठकले पनि पार्टी सदस्यका छोराछोरीलाई संगठनमा आबद्ध गराउने अभियान सञ्चालन गर्ने निर्णय गरेको थियो।

त्यतिबेला केन्द्रीय कमिटी बैठकमा बोल्ने अधिकांश नेताहरूले पार्टीप्रति युवा पुस्ताको आकर्षण घट्दै गएको निष्कर्ष प्रस्तुत गरेका थिए। केही सदस्यहरूले आफ्नै परिवारका छोराछोरीलाई समेत पार्टीको विचार बुझाउन नसक्दा राष्ट्रिय स्वतन्त्र पार्टीजस्ता नयाँ दलतर्फ मत आकर्षित भएको बताएका थिए।

यही अवस्थालाई मध्यनजर गर्दै एमालेले छोराछोरी अभियान सुरु गर्ने निर्णय गरेको थियो। अभियानअन्तर्गत पार्टीका नेता, कार्यकर्ता तथा सदस्यका सन्तानलाई संगठनसँग जोड्ने, राजनीतिक तथा वैचारिक प्रशिक्षण सञ्चालन गर्ने योजना बनाइएको थियो। केही स्थानमा कार्यक्रम सञ्चालन भए पनि देशव्यापी रूपमा प्रभावकारी कार्यान्वयन हुन सकेको थिएन।

एमालेले त्यस अभियानबाट अपेक्षित परिणाम प्राप्त नभएको निष्कर्ष निकाल्दै यसपटक थप व्यवस्थित रूपमा छोराछोरीहरूको सम्मेलन आयोजना गर्ने रणनीति अघि सारेको हो।