काठमाडौं । नेपाली बजारमा आइतबार सुनको मूल्यमा वृद्धि भएको छ। अघिल्लो दिनको तुलनामा प्रतितोला एक हजार दुई सय रुपैयाँले बढेसँगै सुनको भाउ नयाँ उचाइमा पुगेको हो।

नेपाल सुनचाँदी व्यवसायी महासंघका अनुसार आइतबार छापावाल सुनको मूल्य प्रतितोला २ लाख ९३ हजार २ सय रुपैयाँ निर्धारण गरिएको छ। शनिबार यही सुन प्रतितोला २ लाख ९२ हजार रुपैयाँमा कारोबार भएको थियो।

अन्तर्राष्ट्रिय बजारमा बहुमूल्य धातुको मूल्यमा देखिएको उतारचढाव तथा विनिमय दरको प्रभावका कारण नेपाली बजारमा पनि सुनको मूल्य दैनिक रूपमा परिवर्तन हुँदै आएको छ। पछिल्ला दिनहरूमा सुनको भाउ निरन्तर उच्च विन्दुतर्फ उन्मुख देखिएको छ, जसले लगानीकर्ता तथा उपभोक्ता दुवैको चासो बढाएको छ।

यता चाँदीको मूल्य भने स्थिर रहेको छ। महासंघले आइतबार चाँदीको मूल्य प्रतितोला ४ हजार ८९५ रुपैयाँ कायम गरेको जनाएको छ।

सुनको मूल्यमा भएको वृद्धिसँगै विवाह, ब्रतबन्ध तथा अन्य सामाजिक समारोहका लागि गहना खरिद गर्ने उपभोक्तामाथि थप आर्थिक भार पर्ने देखिएको छ। व्यवसायीहरूका अनुसार उच्च मूल्यका कारण बजारमा सुनको कारोबार अपेक्षाकृत सुस्त रहे पनि लगानीका रूपमा सुनप्रतिको आकर्षण भने कायम रहेको छ।