काठमाडौं । धितोपत्र बजारमा मंगलबार कारोबार मापक नेप्से परिसूचक उल्लेख्य अंकले घटेको छ। दिनभरको कारोबारपछि नेप्से २६.१६ अंकले घट्दै २ हजार ६७४.४८ बिन्दुमा पुगेको छ।

ठूला कम्पनीहरूको प्रदर्शन मापन गर्ने सेन्सेटिभ परिसूचक पनि ओरालो लागेको छ। यो परिसूचक २.३१ अंकले घटेर ४६१.४८ बिन्दुमा झरेको छ।

आज ३५३ कम्पनीका एक करोडभन्दा बढी कित्ता शेयर किनबेच भएका छन्। कुल कारोबार रकम ४ अर्ब ३६ करोड रुपैयाँभन्दा बढी पुगेको छ।

कारोबारमा सहभागी अधिकांश कम्पनीको शेयर मूल्य घटेको देखिएको छ। दिनभरको कारोबारमा २२ कम्पनीको शेयर मूल्य बढ्दा २३९ कम्पनीको मूल्य घटेको छ भने ११ कम्पनीको मूल्य स्थिर रहेको छ।

कारोबार रकमका आधारमा आँखुखोला जलविद्युत् कम्पनी सबैभन्दा अगाडि रह्यो। त्यसपछि सोपान फार्मास्युटिकल्स, रिलायन्स स्पिनिङ मिल्स, एनआरएन इन्फ्रास्ट्रक्चर एन्ड डेभलपमेन्ट तथा बुङ्गल हाइड्रोपावरको उच्च कारोबार भएको छ।

मूल्य वृद्धितर्फ टक्सार पिलुवा खोला हाइड्रोपावर, याम्बलिङ हाइड्रोपावर, लक्ष्मी उन्नति कोष, सिद्धार्थ इन्भेस्टमेन्ट ग्रोथ स्किम–३ तथा सनराइज ब्लुचिप फन्डका लगानीकर्ताले बढी लाभ कमाएका छन्।

यता बुङ्गल हाइड्रोपावर, अपोलो हाइड्रोपावर, सोपान फार्मास्युटिकल्स, कालिञ्चोक हाइड्रोपावर र सूर्यकुण्ड हाइड्रोपावरका शेयरधनीले सबैभन्दा बढी घाटा बेहोरेका छन्।

आजको बजार परिणामले अधिकांश क्षेत्रमा बिक्री दबाब देखिएको संकेत गरेको छ भने लगानीकर्ताको मनोबल केही कमजोर बनेको देखिएको छ।