काठमाडौं । सार्वजनिक स्थानमा एक महिलासामु अश्लील व्यवहार गरेको आरोपमा रक्षा मन्त्रालयमा कार्यरत एक शिक्षा अधिकृत पक्राउ परेका छन्।

प्रहरी वृत्त सातदोबाटो, ललितपुरले उनलाई नियन्त्रणमा लिएर अनुसन्धान अघि बढाएको हो।

पक्राउ पर्नेमा बैतडीको पाटन नगरपालिका–७ स्थायी घर भई हाल ललितपुरको महालक्ष्मी नगरपालिका–२ इमाडोल बस्दै आएका ५५ वर्षीय सुरेन्द्र भट्ट रहेका छन्।

प्रहरीका अनुसार भट्टले इमाडोलस्थित सार्वजनिक स्थानमा एक महिलालाई आफ्नो गोप्य अङ्ग देखाउँदै अश्लील हर्कत गरेका थिए। घटनापछि पीडित महिलाले त्यसको भिडियो सामाजिक सञ्जालमा सार्वजनिक गरेकी थिइन्।

भिडियो सार्वजनिक भएपछि प्रहरीले घटनाबारे अनुसन्धान सुरु गरी भट्टलाई पक्राउ गरेको जनाएको छ।

प्रारम्भिक अनुसन्धानका क्रममा भट्ट सिंहदरबारस्थित रक्षा मन्त्रालयमा शिक्षा अधिकृतका रूपमा कार्यरत रहेको खुलेको प्रहरीले जनाएको छ।

हाल उनलाई प्रहरी वृत्त सातदोबाटोको हिरासतमा राखेर घटनाबारे थप अनुसन्धान भइरहेको प्रहरीले जानकारी दिएको छ।