काठमाडौं। नेपाली कांग्रेसको संस्थापन इतर समूहले काठमाडौंको चुनदेवीस्थित आफ्नो सम्पर्क कार्यालय औपचारिक रूपमा सञ्चालनमा ल्याएको छ।

कार्यालय उद्घाटन गर्दै समूहका नेता पूर्णबहादुर खड्काले १४औँ महाधिवेशनबाट निर्वाचित शेखर कोइरालासहित १११ जनालाई वर्तमान केन्द्रीय कार्यसमितिमा समायोजन गर्न प्रस्ताव गरिएको जानकारी दिए।

खड्काले उपसभापति विश्वप्रकाश शर्मासँग सातबुँदे प्रस्तावका विषयमा छलफल भएको उल्लेख गर्दै आफू र शेखर कोइरालालाई वरिष्ठ नेता बनाउने प्रस्ताव आएको भए पनि उक्त प्रस्ताव आफूले अस्वीकार गरेको बताए।

उनका अनुसार अब समूहले पार्टीभित्रका विषयमा नियमित छलफललाई निरन्तरता दिनेछ। साथै, साउन ६ गते पर्ने बीपी जयन्ती विशेष कार्यक्रमका साथ मनाइने पनि उनले जानकारी दिए।

सम्पर्क कार्यालय उद्घाटन कार्यक्रममा शशांक कोइराला, प्रकाशमान सिंह, विमलेन्द्र निधि, कृष्णप्रसाद सिटौला लगायत संस्थापन इतर समूहका शीर्ष नेताहरूको सहभागिता रहेको थियो।