काठमाडौं। संयुक्त अरब इमिरेट्स (यूएई) सरकारले ईद अल-अधा २०२६ को अवसरमा आफ्ना विभिन्न कारागारमा रहेका १११ जना नेपाली नागरिकलाई आममाफी दिएको छ।

परराष्ट्र मन्त्रालयले मंगलबार विज्ञप्ति जारी गर्दै यूएई सरकारको उक्त निर्णयप्रति नेपाल सरकारका तर्फबाट हार्दिक आभार व्यक्त गरेको छ। मन्त्रालयले यसलाई नेपाल–यूएईबीचको मैत्रीपूर्ण सम्बन्ध, आपसी विश्वास र सहयोगको निरन्तरताको सकारात्मक उदाहरणका रूपमा उल्लेख गरेको छ।

मन्त्रालयका अनुसार अबुधाबीस्थित नेपाली दूतावासले परराष्ट्र मन्त्रालयको समन्वयमा गरेको अनुरोधपछि यूएई सरकारले नेपाली नागरिकलाई आममाफी दिने निर्णय गरेको हो।

आममाफी प्राप्त गरेका नेपाली नागरिकमाथि अन्य कुनै कानुनी मुद्दा वा यात्रा प्रतिबन्ध नरहेको अवस्थामा यूएईको प्रचलित कानुनअनुसार आवश्यक कानुनी तथा प्रशासनिक प्रक्रिया पूरा गरेपछि उनीहरू स्वदेश फर्कन सक्नेछन्।

परराष्ट्र मन्त्रालयले यूएई सरकारको यस मानवीय निर्णयले दुई देशबीचको मित्रवत् सम्बन्धलाई थप सुदृढ बनाउने विश्वास व्यक्त गरेको छ। साथै, विदेशमा रहेका नेपाली नागरिकको हित संरक्षणका लागि नेपाल सरकारले सम्बन्धित देशहरूसँग आवश्यक समन्वय र कूटनीतिक पहललाई निरन्तरता दिइरहेको पनि जनाएको छ।