उनले अपराधका घटनामा कमी आउनुको सट्टा असुरक्षा झन् बढ्दै गएको भन्दै दोषीहरूलाई कानुनी दायरामा ल्याउन सरकार असफल भएको आरोप लगाए।

मंगलबार बसेको राष्ट्रियसभा बैठकमा नेपाली कांग्रेसबाट निर्वाचित सांसद पासवानले पीडितहरू सुरक्षित आश्रयस्थलमा लुकेर बस्न बाध्य हुँदा पनि मुख्य अभियुक्तहरू खुलेआम घुमिरहेको अवस्था रहेको बताए।

‘सरकारको सय दिन पूरा भएको छ। मधेसमा अपराधका घटना रोकिनुभन्दा झन् बढेका छन्,’ उनले भने, ‘अपराध बढ्नुको मुख्य कारण अभियुक्तहरू निर्धक्क रूपमा खुला घुम्न पाउनु हो।’

उनले सप्तरीको सुरुङ्गा नगरपालिकाको एउटा घटनालाई उदाहरणका रूपमा प्रस्तुत गर्दै पीडितले अझै पनि सुरक्षित स्थानमा बस्नुपरेको तर मुख्य अभियुक्त भने पक्राउ नपरेको बताए।

‘सप्तरीको सुरुङ्गा नगरपालिका–३ की मञ्जु सदा अहिले पनि कृष्णसदन गाउँपालिकास्थित सेफ हाउसमा सुरक्षित बसिरहेकी छन्, तर मुख्य अभियुक्त खुलेआम घुमिरहेको छ,’ उनले भने, ‘उक्त अभियुक्तलाई तत्काल पक्राउ गरी कानुनी कारबाही अघि बढाउन सरकारसँग जोडदार माग गर्दछु।’

पासवानले अपराध नियन्त्रणका लागि प्रभावकारी अनुसन्धान, दोषीको तत्काल पक्राउ र पीडितको सुरक्षालाई सरकारले प्राथमिकतामा राख्नुपर्ने आवश्यकता पनि औँल्याए।