काठमाडौँ । नेकपा एमालेका अध्यक्ष केपी शर्मा ओली र नेपाल कम्युनिष्ट पार्टी (नेकपा)का संयोजक पुष्पकमल दाहाल ‘प्रचण्ड’बीच भएको भेटवार्ताले पछिल्लो राजनीतिक वृत्तमा नयाँ चर्चा सुरु गरेको छ। दुई नेताबीच भएको छलफलमा प्रदेश सरकारमा सम्भावित सत्ता सहकार्य, समसामयिक राजनीतिक अवस्था तथा वाम शक्तिहरूबीचको सहकार्यलाई थप प्रभावकारी बनाउने विषयमा विचारविमर्श भएको बताइएको छ।

भेटपछि जनकपुरधाममा सञ्चारकर्मीसँग प्रतिक्रिया दिँदै संयोजक प्रचण्डले नेकपा र एमालेबीच सहकार्यको प्रक्रिया औपचारिक रूपमा अघि बढिसकेको बताएका थिए। उनले विभिन्न विषयमा संवाद जारी रहेको र प्रदेश सरकारको सम्भावित सत्ता साझेदारीका विषयमा अन्य राजनीतिक दलसँग पनि छलफल भइरहेको संकेत गरेका थिए।

यसैबीच एमालेका सचिव महेश बस्नेतले सामाजिक सञ्जालमार्फत दुई नेताबीच भएको छलफलबारे थप स्पष्ट पार्दै यसलाई सकारात्मक राजनीतिक पहलका रूपमा व्याख्या गरेका छन्। उनका अनुसार अध्यक्ष ओलीसँगको भेटपछि प्रचण्डले एमालेसँगको सहकार्य औपचारिक रूपमा अघि बढेको जानकारी दिएका हुन्।

बस्नेतले प्रदेश सरकार गठन वा पुनर्संरचनामा हुने सहकार्यलाई मात्र प्राथमिकता नदिई यो प्रयासलाई राष्ट्रिय हित, राजनीतिक स्थायित्व र कम्युनिस्ट शक्तिहरूबीचको दीर्घकालीन सहकार्यसँग जोडेर हेर्नुपर्ने धारणा व्यक्त गरेका छन्। उनले वामपन्थी शक्तिहरूबीच विश्वास, संवाद र सहकार्य बढ्दै जानु मुलुकको समग्र राजनीतिक वातावरणका लागि सकारात्मक हुने विश्वास व्यक्त गरे।

उनका अनुसार पछिल्ला दिनमा बदलिँदो राजनीतिक परिस्थितिमा साझा मुद्दामा सहकार्य गर्ने संस्कृतिको विकास आवश्यक देखिएको छ। त्यसका लागि प्रमुख वाम शक्तिहरूबीच नियमित संवाद र समझदारीले स्थिर राजनीतिक वातावरण निर्माणमा योगदान पुग्न सक्ने उनको भनाइ छ।

दुई शीर्ष नेताबीचको यो भेटलाई प्रदेश सरकारहरूको आगामी समीकरणसँग जोडेर पनि हेरिएको छ। केही प्रदेशमा सत्ता साझेदारीको सम्भावना र नयाँ राजनीतिक समीकरणबारे विभिन्न तहमा छलफल भइरहेका बेला भएको यो भेटले त्यसलाई थप अर्थपूर्ण बनाएको राजनीतिक वृत्तको विश्लेषण छ।

यद्यपि सहकार्यको स्वरूप, सहभागी दलहरूको भूमिका र सम्भावित सहमतिबारे भने कुनै औपचारिक निर्णय सार्वजनिक गरिएको छैन। दुवै पक्षले संवादलाई निरन्तरता दिने संकेत गरेकाले आगामी दिनमा वाम शक्तिहरूबीचको सहकार्य कुन दिशामा अघि बढ्छ भन्ने विषय राजनीतिक रूपमा चासोका साथ हेरिएको छ।