काठमाडौं । झापाको अर्जुनधारा नगरपालिकामा अव्यवस्थित रूपमा बसोबास गर्दै आएका १८ परिवारलाई जग्गाधनी पुर्जा (लालपुर्जा) वितरण गरिएको छ।

जिल्ला भूमि समस्या समाधान समिति झापाले बिहीबार आयोजित कार्यक्रममा उनीहरूलाई लालपुर्जा हस्तान्तरण गरेको हो।

लामो समयदेखि आफूले बसोबास गर्दै आएको जग्गाको कानुनी स्वामित्व नपाएका परिवारले लालपुर्जा पाएसँगै अब उनीहरू सम्बन्धित जग्गाका कानुनी धनी बनेका छन्।

भूमि व्यवस्था तथा सम्बन्धित निकायका अनुसार भूमिहीन दलित, भूमिहीन सुकुम्बासी र अव्यवस्थित बसोबासीको समस्या समाधानलाई सरकारले प्राथमिकतामा राखेर विभिन्न जिल्लामा लालपुर्जा वितरण अभियान अघि बढाइरहेको छ।

यसअघि बर्दियाको बढैयाताल र झापाकै बुद्धशान्ती गाउँपालिकामा पनि भूमिहीन तथा अव्यवस्थित बसोबासी परिवारलाई जग्गाधनी पुर्जा वितरण गरिएको थियो।

सरकारले भूमिहीन दलित, भूमिहीन सुकुम्बासी तथा अव्यवस्थित बसोबासीलाई कानुनी रूपमा जग्गाको स्वामित्व दिलाउने दीर्घकालीन लक्ष्यअनुसार लालपुर्जा वितरण कार्यक्रमलाई थप प्रभावकारी बनाउँदै लैजाने जनाएको छ।