काठमाडौं। वरिष्ठ अधिवक्ता टिकाराम भट्टराईले वर्तमान सरकारले प्रतिपक्षी दल विशेषगरी नेकपा (एमाले) विरुद्ध प्रतिशोधको राजनीति गरिरहेको आरोप लगाएका छन्।

पुष्पलाल श्रेष्ठको ४५औँ स्मृति दिवसका अवसरमा आयोजित कार्यक्रममा बोल्दै भट्टराईले सरकारले संविधान संशोधनको नाममा गठन गरेको कार्यदलसमेत गैरकानुनी रहेको दाबी गरे।

उनले संविधान संशोधन आवश्यक रहेको स्वीकार गर्दै त्यसका लागि बनाइएको कार्यदलको नेतृत्व प्रतिनिधिसभा सदस्यले गर्नुपर्ने संवैधानिक व्यवस्था रहेको बताए। अहिलेको कार्यदल गठन प्रक्रिया त्यसअनुकूल नभएको उनको भनाइ थियो।

भट्टराईले संविधान संशोधनको प्रक्रिया प्रभावकारी रूपमा अघि बढ्न नसक्नुमा राष्ट्रिय स्वतन्त्र पार्टी (रास्वपा) पनि जिम्मेवार रहेको आरोप लगाउँदै उसले संशोधनको काम बिथोलेको टिप्पणी गरे।

उनले संविधान संशोधनजस्तो संवेदनशील विषय कानुन र संवैधानिक व्यवस्थाअनुसार अघि बढाउन सरकारलाई आग्रहसमेत गरे।