काठमाडौं। नेकपा नेता नारायणकाजी श्रेष्ठले सुशासनको नाममा वर्तमान रास्वपा नेतृत्वको सरकारले उल्टै सुशासनमाथि कुठाराघात गरेको आरोप लगाएका छन्।

उनले संविधान निर्माणमा प्रमुख भूमिका खेलेका राजनीतिक दलहरूलाई योजनाबद्ध रूपमा किनारा लगाउने प्रयास भइरहेको भन्दै त्यसप्रति गम्भीर चिन्ता व्यक्त गरे। लोकतान्त्रिक व्यवस्था र संविधानमाथि हुने कुनै पनि प्रहार स्वीकार्य नहुने उनको भनाइ थियो।

श्रेष्ठले विगतका कमजोरी स्वीकार गर्दै आत्मालोचना गरेर अघि बढ्नुपर्ने आवश्यकता औंल्याए। उनले कठोर संघर्ष र बलिदानबाट प्राप्त संविधानको रक्षा गर्नु अहिले सबै राजनीतिक शक्तिको साझा जिम्मेवारी भएको बताए।

त्यस्तै, नेपालका कम्युनिष्ट शक्तिहरूलाई एउटै केन्द्रमा एकीकृत गर्नुपर्ने धारणा राख्दै उनले एकपटकको असफलतालाई आधार बनाएर एकताको प्रयास नै त्याग्न नहुने बताए। कम्युनिष्ट आन्दोलनलाई बलियो बनाउन एकताको विकल्प नभएको उनको भनाइ थियो।