काठमाडौं। नेकपा (एमाले)का अध्यक्ष तथा पूर्वप्रधानमन्त्री केपी शर्मा ओलीले संविधान, लोकतन्त्र र सुशासनको रक्षा गर्न वामपन्थी तथा लोकतान्त्रिक शक्तिहरूबीच सहकार्य आवश्यक रहेको बताएका छन्।

पुष्पलाल श्रेष्ठको ४५औँ स्मृति दिवसका अवसरमा आयोजित कार्यक्रममा उनले समान उद्देश्य भएका राजनीतिक शक्तिहरू जनताको हितका लागि एकजुट हुनुपर्ने बताए।

ओलीले प्रदेश सरकारबारे देखिएको अन्योल चाँडै अन्त्य हुने दाबी गर्दै प्रदेश र स्थानीय सरकार नियमित रूपमा सञ्चालन हुने विश्वास व्यक्त गरे।

उनले वर्तमान सरकारको कार्यशैलीको आलोचना गर्दै पञ्चायतकालमा समेत अहिलेजस्तो बर्बरता नदेखिएको दाबी गरे। साथै, पार्टीका नेता–कार्यकर्तामाथि दमन गरिएको र सरकारले संविधानविरोधी गतिविधि गरिरहेको आरोप लगाए।

कार्यक्रममा उनले नेपाल कम्युनिस्ट आन्दोलनका संस्थापक पुष्पलाल श्रेष्ठको योगदानको चर्चा गर्दै सामाजिक रूपान्तरणका लागि पुष्पलालले आफ्नो समयमै सबैभन्दा व्यवस्थित र विकसित वैचारिक आधार प्रस्तुत गरेको उल्लेख गरे।