काठमाडौं। गुडिरहेको मोटरसाइकलको पछाडि उभिएर भिडियो बनाएको दृश्य सामाजिक सञ्जालमा भाइरल भएपछि राष्ट्रिय स्वतन्त्र पार्टी (रास्वपा)का प्रतिनिधिसभा सदस्य बब्लु गुप्तालाई ट्राफिक प्रहरीले ५ सय रुपैयाँ जरिबाना गरेको छ।

सिरहा–१ बाट निर्वाचित सांसद गुप्ता जिल्ला ट्राफिक प्रहरी कार्यालय, लहान पुगेर आफैंले जरिबाना बुझाएको प्रहरीले जनाएको छ। उनीमाथि ट्राफिक नियम उल्लंघन गरेको कसुरमा कारबाही गरिएको हो।

सामाजिक सञ्जालमा सार्वजनिक भएको भिडियोमा सांसद गुप्ता गुडिरहेको बुलेट मोटरसाइकलको पछाडिको सिटमा उभिएर मोबाइलबाट भिडियो खिचिरहेको देखिएका थिए। उक्त भिडियो सार्वजनिक भएपछि जिम्मेवार सार्वजनिक पदमा रहेका व्यक्तिले नै सडक सुरक्षाका आधारभूत नियम उल्लंघन गरेको भन्दै व्यापक आलोचना भएको थियो।

सांसदजस्ता जनप्रतिनिधिमाथि पनि सर्वसाधारणसरह कानुन लागू हुन्छ कि हुँदैन भन्ने प्रश्न उठिरहेका बेला ट्राफिक प्रहरीले उनीमाथि सवारी तथा यातायात व्यवस्था ऐनअनुसार ५ सय रुपैयाँ जरिबाना गरेको हो।

कारबाहीपछि सामाजिक सञ्जालमा मिश्रित प्रतिक्रिया देखिएको छ। केहीले कानुन सबैका लागि समान भएको सन्देश दिएको भन्दै ट्राफिक प्रहरीको कदमको स्वागत गरेका छन्। अर्कोतर्फ, जोखिमपूर्ण गतिविधिका लागि ५ सय रुपैयाँको जरिबाना पर्याप्त नभएको टिप्पणी पनि गरिएको छ।

आलोचना चुलिएपछि सांसद गुप्ताले सामाजिक सञ्जालमार्फत सार्वजनिक रूपमा क्षमायाचना गरेका छन्। उनले बाल्यकाल बिताएको स्थानमा पुगेपछि पुराना सम्झनाले भावुक बनेर रमाइलोका क्रममा भिडियो बनाउँदा आफूबाट ट्राफिक नियम उल्लंघन भएको स्वीकार गरेका छन्।

उनले अब आफ्नो ऊर्जा देश र जनताको हितमा लगाउने प्रतिबद्धता जनाउँदै आफूबाट जानी वा नजानी भएको गल्तीका लागि सबैसँग क्षमा मागेका छन्।

यसअघि पनि ट्राफिक नियम उल्लंघन गरेका सार्वजनिक पदाधिकारीमाथि कारबाही भएका उदाहरण छन्। हेल्मेट नलगाई मोटरसाइकल चलाएका सुदूरपश्चिमका मुख्यमन्त्री कमलबहादुर शाहलाई जिल्ला ट्राफिक प्रहरी कार्यालय कैलालीले ५ सय रुपैयाँ जरिबाना गरेको थियो। यस्तै, श्रम संस्कृति पार्टीका अध्यक्ष हर्कराज राई (हर्क साम्पाङ) पनि ट्राफिक नियम उल्लंघनको कसुरमा ट्राफिक प्रहरीको कारबाहीमा परेका थिए।