काठमाडौं। नेपाल आयल निगम सुर्खेतले वीरेन्द्रनगर क्षेत्रमा एलपी ग्यासको अभाव नभएको स्पष्ट पारेको छ। निगमका अनुसार भारतबाट आवश्यक परिमाणमा एलपी ग्यास नियमित रूपमा आयात भइरहेकाले बजारमा ग्यास सकिएको भन्ने हल्लामा सत्यता छैन।

निगमले पछिल्लो समय ग्यास अभाव हुन सक्ने मनोवैज्ञानिक त्रासका कारण उपभोक्ताले आवश्यकताभन्दा बढी सिलिन्डर सञ्चय गर्न थालेपछि वितरण प्रणालीमा केही दबाब देखिएको जनाएको छ। यही कारण केही स्थानमा असहज अवस्था देखिए पनि वास्तविक रूपमा आपूर्ति प्रणाली नियमित रहेको निगमको भनाइ छ।

नेपाल आयल निगम सुर्खेतका प्रमुख दीपककुमार घिमिरेका अनुसार उपभोक्तालाई सहज रूपमा ग्यास उपलब्ध गराउन ‘एक व्यक्ति, एक सिलिन्डर’ व्यवस्था लागू गरिएको छ। अधिकृत बिक्रेतामार्फत विभिन्न कम्पनीका १४.२ केजी क्षमताका दुई हजार ९२२ वटा एलपी ग्यास सिलिन्डर प्रतिगोटा दुई हजार ६० रुपैयाँमा बिक्री–वितरण गरिने उनले जानकारी दिए।

त्यसैगरी नेपाल ग्यासका थप ३२० वटा सिलिन्डर वीरेन्द्रनगर औद्योगिक क्षेत्रमा रहेको न्यू जानकी ट्रेड एण्ड सप्लायर्समार्फत वितरण गरिने निगमले जनाएको छ।

निगमले उपभोक्तालाई अनावश्यक रूपमा ग्यास सञ्चय नगर्न आग्रह गर्दै अधिकृत बिक्रेताबाट मात्रै ग्यास खरिद गर्न अनुरोध गरेको छ। साथै तोकिएको मूल्यभन्दा बढी रकम असुलेको, मौज्दात हुँदाहुँदै ग्यास बिक्री नगरेको वा अनधिकृत रूपमा ग्यास सञ्चय गरेको पाइएमा सम्बन्धित निकायलाई तत्काल जानकारी गराउन पनि आग्रह गरिएको छ।

निगमका अनुसार आपूर्ति प्रणाली नियमित रहेकाले उपभोक्ताले हल्लाको पछि नलागी आवश्यकताअनुसार मात्रै ग्यास खरिद गरे बजारमा सहज वितरण कायम रहनेछ।