काठमाडौं । नेकपा एमालेका सचिव महेश बस्नेतले प्रधानमन्त्री बालेन्द्र शाह (बालेन) नेतृत्वको सरकारले २७ जना स्वकीय सचिव राज्यको खर्च बढाएको आरोप लगाएका छन्।

उनले सामाजिक सञ्जालमार्फत प्रतिक्रिया दिँदै केपी शर्मा ओली प्रधानमन्त्री हुँदा ११ जना सल्लाहकार रहेकामा अहिले बालेन नेतृत्वमा २७ जना स्वकीय सचिव नियुक्त गरेर राज्यको खर्च बढाइरहेको उनको दाबी छ। 

मन्त्रीमण्डल सानो बनाएर खर्च घटाएको दाबी गरिए पनि हटाइएका मन्त्री र सांसदका पीए तथा सल्लाहकारलाई पुनः नियुक्ति दिई राज्यकोषमा थप आर्थिक भार पारिएको उनको आरोप छ।

‘मन्त्रीमण्डल सानो बनाएर राज्यको ढुकुटी बचाए भनेर हल्ला गर्ने बालेनहरू हिजो हटाइएका मन्त्री र सांसदका पीए तथा सल्लाहकारहरूलाई पुन नियुक्ति दिएर राज्यकोषबाट तलब सुविधा दिएर राखेका छन्,’ उनले फेसबुकमा लेखेका छन्। 

बस्नेतले हिजो अरूको आलोचना गर्नेहरू नै आज पद, नियुक्ति र सुविधाको जालो विस्तार गरिरहेको टिप्पणी गरेका छन्।