सुर्खेत। केन्द्रमा नेकपा (एमाले) र नेपाली कम्युनिस्ट पार्टी (नेकपा) बीच नयाँ सत्ता समीकरणमा सहमति भएसँगै यसको प्रत्यक्ष प्रभाव कर्णाली प्रदेशको राजनीतिमा परेको छ।

शनिबार एमाले अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’ले सत्ता साझेदारीसम्बन्धी सहमतिपत्रमा हस्ताक्षर गरेपछि कर्णालीमा पनि नयाँ सरकार गठनको प्रक्रिया अघि बढ्ने भएको हो।

यसअघि कर्णालीमा नेपाली कांग्रेसको समर्थनमा सरकार परिवर्तन गर्ने तयारी भइरहेको थियो। तर केन्द्रको नयाँ राजनीतिक सहमतिसँगै प्रदेशको सत्ता समीकरणसमेत फेरिएको छ। अब कर्णालीमा नेकपाको नेतृत्वमा नयाँ सरकार बन्ने लगभग निश्चित भएको राजनीतिक वृत्तमा चर्चा छ।

कर्णाली प्रदेश सरकार गत असार ३१ गतेदेखि राजनीतिक संकटमा परेको थियो। नेपाली कांग्रेसले मुख्यमन्त्री यामलाल कँडेल नेतृत्वको सरकारलाई दिएको समर्थन फिर्ता लिएपछि सरकार अल्पमतमा परेको थियो। त्यसको भोलिपल्ट असार ३२ गते कांग्रेस र नेकपाले संयुक्त रूपमा मुख्यमन्त्रीविरुद्ध अविश्वास प्रस्ताव दर्ता गरेका थिए।

कांग्रेस संसदीय दलका नेता जीवनबहादुर शाहीलाई मुख्यमन्त्री बनाउने उद्देश्यसहित दर्ता गरिएको उक्त प्रस्तावमा नेकपाका ११ र कांग्रेसका ५ गरी १६ जना प्रदेशसभा सदस्यको हस्ताक्षर थियो। त्यसबेला कांग्रेस–नेकपाबीच नयाँ सरकार गठनको समझदारी बनेको देखिएको थियो।

अविश्वास प्रस्तावमाथि छलफलका लागि प्रदेशसभाको बैठक बोलाइए पनि त्यसअघि नै मुख्यमन्त्री यामलाल कँडेलले प्रदेशसभालाई सम्बोधन गर्दै पदबाट राजीनामा दिएका थिए। राजीनामासँगै नयाँ सरकार गठनको संवैधानिक प्रक्रिया सुरु भएको छ।