काठमाडौं। सुनसरीको देवानगञ्ज गाउँपालिका-३, कप्तानगञ्जमा साउने सोमबार बोलबम यात्राको तयारीका क्रममा भएको हिंसात्मक झडपले अब तराईका अन्य जिल्लामा समेत प्रभाव पार्न थालेको छ। डिजे बाजा बजाउने विषयलाई लिएर दुई समुदायबीच सुरु भएको विवाद प्रहरीको गोली चल्नेसम्म पुग्यो।

घटनामा एक जनाको मृत्यु भएपछि सुनसरीमा तनाव कायम रहँदा त्यसको विरोधमा सिरहामा समेत प्रदर्शन भएको छ। केहीबेर पूर्व–पश्चिम राजमार्ग अवरुद्ध गरिएपछि सुरक्षा निकायले उच्च सतर्कता अपनाएको छ।

सुनसरीको कप्तानगञ्जमा बोलबम यात्राका लागि डिजे बजाउँदै सप्तकोशी नदीतर्फ जाने क्रममा दुई समुदायबीच सामान्य भनाभन सुरु भएको थियो। स्थानीयका अनुसार विवाद चाँडै उग्र बन्दै हिंसात्मक झडपमा परिणत भयो। प्रदर्शनकारीले ढुंगामुढा गर्न थालेपछि सुरक्षाकर्मीले सुरुमा अश्रुग्यास प्रहार र हवाई फायर गरेका थिए। त्यसबाट पनि अवस्था नियन्त्रणमा नआएपछि प्रहरीले गोली चलाएको जनाएको छ।

प्रहरीको गोली लागेर देवानगञ्ज–३ का २४ वर्षीय ओमप्रकाश मेहता गम्भीर घाइते भएका थिए। उनलाई उपचारका लागि विराटनगरस्थित न्युरो अस्पताल लगिएको भए पनि उपचारकै क्रममा मृत्यु भएको हो। उनको मृत्युपछि स्थानीय बासिन्दा थप आक्रोशित बनेका छन्।

घटनामा सर्वसाधारण र सुरक्षाकर्मीसहित २२ जना घाइते भएका छन्। सर्वसाधारणतर्फ गोली लागेका घाइतेहरूको विराटनगरका न्युरो अस्पताल, विराट नर्सिङ होम र नोबेल अस्पतालमा उपचार भइरहेको छ। केही घाइतेको पेट, कम्मर, ढाड र तिघ्रामा गोली लागेको छ भने दुई जनालाई आईसीयूमा राखेर उपचार भइरहेको जनाइएको छ।

सुरक्षाकर्मीतर्फ इलाका प्रहरी कार्यालय देवानगञ्जका प्रहरी निरीक्षक राकेश राईसहित १३ जना घाइते भएका छन्। प्रदर्शनकारीले प्रहरीमाथि ढुंगामुढा र आक्रमण गरेपछि सुरक्षाकर्मी पनि घाइते भएका हुन्।

स्थिति थप बिग्रिएपछि जिल्ला प्रशासन कार्यालय सुनसरीले बिहान ७ बजेदेखि देवानगञ्ज गाउँपालिका र आसपासका क्षेत्रमा अनिश्चितकालीन कफ्र्यु लागू गरेको छ। तर कफ्र्युका बीच पनि प्रदर्शन र तोडफोड नरोकिएपछि नेपाल प्रहरी र सशस्त्र प्रहरी बलसँगै नेपाली सेना समेत परिचालन गरिएको छ। प्रमुख जिल्ला अधिकारी वासुदेव घिमिरेका अनुसार स्थानीय प्रशासनको आग्रहमा सेना परिचालन गरिएको हो।

यस घटनाको प्रभाव सुनसरीमा मात्र सीमित रहेन। ओमप्रकाश मेहताको मृत्युको विरोधमा सिरहाको कर्जन्हा नगरपालिका–बन्दीपुर क्षेत्रमा स्थानीयले प्रदर्शन गर्दै पूर्व–पश्चिम राजमार्ग अवरुद्ध गरेका छन्। प्रदर्शनकारीले सडकमा टायर बालेर केहीबेर यातायात ठप्प पारेका थिए।

जिल्ला प्रहरी कार्यालय सिरहाका प्रहरी उपरीक्षक बासुदेव पाठकका अनुसार सुनसरी घटनाको विरोधमा स्थानीयले राजमार्ग अवरुद्ध गरे पनि प्रहरीको सम्झाइ–बुझाइपछि सडक पुनः सञ्चालनमा आएको छ। उनका अनुसार अहिले सिरहाको अवस्था सामान्य रहे पनि सुरक्षा निगरानी बढाइएको छ।

नेपाल–भारत सीमासँग जोडिएको देवानगञ्ज क्षेत्र संवेदनशील मानिन्छ। स्थानीयका अनुसार यसअघि पनि विभिन्न धार्मिक तथा सामाजिक विषयलाई लिएर दुई समुदायबीच बेला–बेलामा तनाव र झडप हुने गरेका छन्। पछिल्लो घटनाले फेरि साम्प्रदायिक सद्भाव र सुरक्षा व्यवस्थामाथि प्रश्न उठाएको छ।

सुरक्षा निकायले अहिले सुनसरीसहित आसपासका जिल्लामा उच्च सतर्कता अपनाएको छ। सम्भावित थप तनाव रोक्न संवेदनशील क्षेत्रमा अतिरिक्त सुरक्षा बल परिचालन गरिएको छ भने सामाजिक सञ्जालमार्फत भ्रामक सूचना नफैलाउन प्रशासनले सबैसँग आग्रह गरेको छ।

घटनाको वास्तविक कारण, गोली चलाउनुपर्ने अवस्था कसरी सिर्जना भयो र त्यसमा कसको कति जिम्मेवारी छ भन्ने विषयमा प्रहरीले विस्तृत अनुसन्धान अघि बढाएको जनाएको छ।

प्रशासनले स्थानीय समुदायका अगुवा, जनप्रतिनिधि तथा सुरक्षा निकायबीच निरन्तर समन्वय गरेर अवस्था सामान्य बनाउन प्रयास भइरहेको जनाएको छ।