काठमाडौं। त्रिभुवन विश्वविद्यालयको एमबीएस प्रथम सेमेस्टरको प्रश्नपत्र बाहिरिएको प्रकरणमा प्रहरीले थप दुई जनालाई पक्राउ गरेको छ।

पक्राउ पर्नेमा रौतहटको राजदेवी नगरपालिका–४ निवासी २५ वर्षीय अतुलकुमार मिश्र र बाराको लिपनीमाल घर भएका ३१ वर्षीय अब्दुल सानी हाकिम रहेका छन्।

उनीहरूलाई नेपाल प्रहरीको केन्द्रीय अनुसन्धान ब्युरो (सीआईबी)को टोलीले पक्राउ गरेको हो। प्रश्नपत्र बाहिरिएको घटनामा संलग्नताको आशंकामा उनीहरूमाथि थप अनुसन्धान भइरहेको प्रहरीले जनाएको छ।

यसअघि यही प्रकरणमा दुई जना पक्राउ परिसकेका थिए। प्रहरीले घटनामा संलग्न अन्य व्यक्तिको खोजी तथा अनुसन्धान जारी रहेको जनाएको छ।