काठमाडौं। साताको अन्तिम कारोबार दिन शुक्रबार सेयर बजारमा सुधार देखिएको छ। लगातार चार कारोबार दिन घटेको नेप्से परिसूचक शुक्रबार १२.९६ अंकले बढेर २ हजार ६८५ अंकमा पुगेको हो।

यो साताको सुरुवातदेखि नै लगातार दबाबमा रहेको बजारमा शुक्रबारको सुधार आए पनि समग्र साप्ताहिक प्रदर्शन भने कमजोर रह्यो। गत शुक्रबार २ हजार ७३४ अंकमा रहेको नेप्से यस शुक्रबारसम्म आइपुग्दा ४९ अंकले घटेको छ।

पूर्वी तराईमा देखिएको अशान्तिले यो साता सेयर बजारमा समेत प्रभाव पारेको देखिएको छ।

शुक्रबार कारोबार रकममा भने सामान्य वृद्धि भएको छ। अघिल्लो दिन ३ अर्ब ३८ करोड रुपैयाँ बराबरको कारोबार भएकोमा शुक्रबार ३ अर्ब ७५ करोड रुपैयाँ पुगेको छ।

कारोबार भएका कम्पनीमध्ये १८० वटाको सेयर मूल्य बढेको छ भने ८२ कम्पनीको मूल्य घटेको छ। १३ कम्पनीको मूल्य भने स्थिर रह्यो।

शुक्रबार अधिकांश समूहगत सूचकमा वृद्धि भएको छ। यद्यपि, कुनै पनि समूहको उतारचढाव १ प्रतिशतभन्दा बढी रहेन।

बैंकिङ समूह ०.७२ प्रतिशत, विकास बैंक ०.४८, फाइनान्स ०.१८, होटल तथा पर्यटन ०.४८, जलविद्युत् ०.६९, लगानी ०.२३, जीवन बीमा ०.१९, उत्पादन तथा प्रशोधन ०.२५, माइक्रोफाइनान्स ०.२४ र अन्य समूह ०.९३ प्रतिशतले बढेका छन्।

यसैगरी निर्जीवन बीमा समूह ०.१६ प्रतिशत र व्यापार समूह ०.०७ प्रतिशतले घटेका छन्।

शुक्रबार एभरेस्ट कलरको सेयर मूल्य सबैभन्दा धेरै १५ प्रतिशतले बढेको छ। सूचीकृत भएयता कम्पनीको सेयर मूल्य निरन्तर बढिरहेको छ।

त्यस्तै, जोशी हाइड्रोपावरको ६.७९ प्रतिशत, अपर लोहोरेखोलाको ६.४४ प्रतिशत, युनिभर्सल पावरको ४.३२ प्रतिशत र विकास हाइड्रोपावरको ३.६८ प्रतिशतले मूल्य बढेको छ।

घट्ने कम्पनीतर्फ बोटलर्स नेपाल बालाजुको सेयर मूल्य ५.३३ प्रतिशतले घटेको छ। कालिन्चोक हाइड्रोपावरको ३.५५ प्रतिशत र कर्पोरेट डेभलपमेन्ट बैंकको ३.०३ प्रतिशतले मूल्य घटेको छ।

रकमका आधारमा शुक्रबार सबैभन्दा धेरै कारोबार हुने कम्पनीमा रिडी पावर, ग्लोबल आईएमई बैंक, सेन्ट्रल फाइनान्स, रिलायन्स स्पिनिङ मिल्स र कर्पोरेट डेभलपमेन्ट बैंक रहेका छन्।

चार दिनको लगातार गिरावटपछि शुक्रबार बजारमा आएको सुधारले लगानीकर्तामा केही राहत दिए पनि साप्ताहिक रूपमा भने नेप्से दबाबमै रहेको देखिएको छ।