काठमाडौं। देशका विभिन्न ठाउँमा खाना पकाउने एलपीजी ग्यासको अभाव देखिन थालेको छ। ग्यास लिन उपभोक्ताहरू सप्लायर्सकहाँ लामो लाइन लाग्न थालेका छन् भने एक सिलिन्डर ग्यासका लागि समेत हप्तासम्म कुर्नुपर्ने अवस्था सिर्जना भएको छ।

काठमाडौंको बालाजु औद्योगिक क्षेत्रमा रहेको नेपाल ग्यासको बिक्री केन्द्रमा समेत उपभोक्ताको लामो लाइन देखिएको छ। ग्यास लिन बिहानैदेखि लाइनमा बसेका उपभोक्ताले सहज रूपमा सिलिन्डर नपाएको गुनासो गरेका छन्।

नेपाल आयल निगमले फागुनको अन्तिम सातादेखि आधा सिलिन्डर ग्यास मात्रै वितरण गर्दै आएको थियो। तर असारको अन्तिमदेखि पूर्ण क्षमताको सिलिन्डर वितरण गर्न थालेपछि बजारमा ग्यासको माग एक्कासि बढेको व्यवसायीहरू बताउँछन्।

निगमले पूर्ण सिलिन्डर वितरण सुरु गरेसँगै उपभोक्ताले समेत ग्यासको मौज्दात बढाउन खोज्दा साउनको पहिलो सातादेखि बजारमा ग्यास पाउन कठिन भएको देखिएको छ।

विशेषगरी काठमाडौं उपत्यकालगायत देशका विभिन्न क्षेत्रमा ग्यास बिक्री केन्द्रमा उपभोक्ताको भीड बढेको छ। कतिपय उपभोक्ताले नियमित रूपमा पाइरहेको ग्याससमेत समयमा नपाएको गुनासो गरेका छन्।

तर, बजारमा उपभोक्ताले ग्यास नपाइरहेका बेला नेपाल आयल निगमले भने देशभर एलपीजी ग्यासको कुनै अभाव नरहेको दाबी गर्दै आएको छ।

निगमले आपूर्ति प्रणालीमा समस्या नभएको बताइरहे पनि बिक्री केन्द्रमा देखिएको लामो लाइन र उपभोक्ताले भोग्नुपरेको सास्तीले बजारमा ग्यासको आपूर्ति र वितरण व्यवस्थापनमाथि प्रश्न उठेको छ।

तस्वीरहरू: