काठमाडौं। बजारमा खाना पकाउने एलपी ग्यासको अभाव देखिएको भन्दै उपभोक्ताको गुनासो बढिरहेका बेला नेपाल आयल निगमले भने आपूर्ति नियमित रहेको दाबी गरेको छ।

दैनिक मागअनुसार ग्यास उपलब्ध भइरहे पनि केही स्थानमा वितरणमा समस्या देखिएको भन्दै निगमले आपूर्ति सहज बनाउन थप व्यवस्था गरेको जनाएको छ।

काठमाडौं उपत्यकामा ग्यासको माग बढेपछि निगमले साउन १६ गतेदेखि टेकुस्थित कार्यालयबाटै ग्यास बिक्री गर्ने व्यवस्था मिलाएको छ। निगमका अनुसार बिहान ११ बजेदेखि बेलुका ५ बजेसम्म सम्बन्धित उद्योगमार्फत विभिन्न ब्रान्डका ग्यास सिलिन्डर बिक्री गरिनेछ।

टेकुबाट नेपाल ग्यास, एचपी ग्यास, एभरेस्ट ग्यास, सुगम ग्यास र श्रीराम ग्यासका सिलिन्डर उपलब्ध गराइने निगमले जनाएको छ।

ग्यासको वितरण व्यवस्थित बनाउन निगमले उद्योगी तथा विक्रेतालाई घरायसी प्रयोजनका उपभोक्तालाई प्राथमिकता दिन निर्देशन दिएको छ। बिक्रीका क्रममा खरिदकर्ताको नाम, ठेगाना र सम्पर्क नम्बरसमेत अभिलेख राख्न भनिएको छ।

निगमले बजारमा ग्यास नपाए उपभोक्ताले कार्यालय समयमा ०१–५९७१९०२ नम्बरमा सम्पर्क गर्न सक्ने जनाएको छ।

निगमले एलपी ग्यासको आयात तथा बिक्री वितरण नियमित रहेको भन्दै उपभोक्तालाई आवश्यकताभन्दा बढी ग्यास सञ्चित नगर्न आग्रह गरेको छ। आपूर्ति निरन्तर भइरहेकाले अस्वाभाविक रूपमा ग्यास भण्डारण गर्दा बजारमा कृत्रिम अभावको अवस्था सिर्जना हुन सक्ने निगमको भनाइ छ।

यसअघि पनि बजारमा ग्यास अभावको गुनासो बढेपछि निगमले माघ २८ गतेदेखि टेकु परिसरबाट प्रत्यक्ष बिक्री सुरु गरेको थियो। पश्चिम एसियामा द्वन्द्व बढेपछि आपूर्तिमा दबाब पर्न सक्ने अवस्थालाई ध्यानमा राख्दै त्यतिबेला आधा सिलिन्डर ग्यास वितरण गरिएको थियो।

आधा सिलिन्डर वितरणपछि बजारमा आपूर्ति सहज बनेसँगै टेकुबाट हुने प्रत्यक्ष बिक्री रोकिएको थियो। अहिले पुनः बजारमा माग बढेपछि निगमले उपभोक्तालाई सहज रूपमा ग्यास उपलब्ध गराउन टेकुबाट बिक्री सुरु गरेको हो।

तस्वीरहरू: